Puntland oo ku amartay Saraakiil goostay inay hubka soo celiyaan

Garoowe – Dowladda Puntland ayaa amar degdeg ah ku siisay saraakiil ciidan oo ka goostay, una wareegay dowladda federaalka inay si dhaqso ah u soo celiyaan hubka, gaadiidka iyo saldhigyada ciidan ee ay la baxeen, iyagoo ka digay in arrintaasi haddii ay sii socoto ay keeni karto cawaaqib amni oo halis ah.

Taliyaha Ciidanka Booliska Puntland, Jeneraal Muumin Cabdi Shire, ayaa sheegay in saraakiishaasi ay si sharci-darro ah u haystaan hanti dowladeed oo ay leeyihiin Puntland, taasoo ay ka mid yihiin hub, gaadiid iyo xarumo ciidan. Wuxuu carrabka ku adkeeyay in qalabkaasi yahay hanti dadweyne isla markaana aan la oggolaan karin in si sharci-darro ah loo haysto.

“Qofna sharciga kama sarreeyo,” ayuu yiri JeneraPuntland oo ku amartay saraakiil goostay inay hubka ku soo celiyaanal Muumin. “Saraakiisha ku lug yeeshay arrimo siyaasadeed waa inay soo celiyaan hantida dowladda iyo saldhigyada ciidan. Haddii taas la waayo, cawaaqibkeedu wuxuu noqon karaa mid khatar ku ah amniga.”

Saraakiisha uu amarku khuseeyo ayaa haatan ku sugan magaalada Laascaanood, oo ah xarunta maamulka Waqooyi-bari ee Soomaaliya, halkaas oo cutubyo hore uga tirsanaa Puntland, oo ay ku jiraan qaybo ka mid ah Guutada Danab iyo Ciidanka Amniga Puntland (PSF), ay ku biireen ciidamada federaalka, iyagoo sugaya amniga madaxda sare.

Khilaafkan ayaa imanaya xilli dib-u-habeyn degdeg ah laga dareemayo ciidamada hubeysan, kadib dhismaha Maamulka Waqooyi-bari ee Soomaaliya, kaas oo ay aqoonsan tahay dowladda federaalka, kuna fadhiya gobollada Sool, Sanaag iyo Cayn. Laascaanood ayaa tan iyo bixitaankii ciidamada Somaliland sanadkii hore noqotay xarun ay isku hayaan dhinacyo siyaasadeed oo kala aragti duwan, isla markaana ay ka muuqdaan is-beddello daacadnimo.

Horraantii toddobaadkan, Taliyaha Guutada Danab, Jeneraal Jimcaale Jaamac Takar, ayaa Laascaanood ka sheegay in ciidankiisu aysan mar dambe u aqoonsanayn Madaxweynaha Puntland, Siciid Cabdullaahi Deni, inuu yahay taliyaha guud. Wuxuu sheegay in cutubkaasi si ku-meel-gaar ah isu hoos geynayo Madaxweynaha Maamulka Laascaanood, Cabdulqaadir Axmed Aw-Cali (Firdhiye).

Hadalkan ayaa sii huriyay xiisadda u dhaxeysa Garoowe iyo Muqdisho, xilli xiriirkooda uu sii xumaanayo sababo la xiriira muranno ku saabsan awood-qaybsiga federaalka, doorashooyinka iyo maamulka guud ee dalka.

Madaxweynaha Soomaaliya Xasan Sheekh Maxamuud iyo Ra’iisul Wasaare Xamse Cabdi Barre ayaa Sabtidii ka qeyb galay caleema-saarka Madaxweyne Firdhiye ee ka dhacay Laascaanood, iyadoo ay goob joog ka ahaayeen mas’uuliyiin federaal ah, hoggaamiyeyaal goboleed, isimmo dhaqameed iyo diblomaasiyiin shisheeye. Xafladdaas oo si weyn loo hadal hayay ayaa loo arkay muujin cad oo taageero federaal ah u ah maamulka cusub, isla markaana caqabad ku ah saameynta Puntland ee deegaanka.

Mas’uuliyiinta Puntland ayaa ku doodaya in ka goosashada saraakiisha iyo la wareegista qalab ciidan ay khatar ku tahay nidaamka amniga iyo hoggaaminta ciidamadooda.

Dhanka kale, mas’uuliyiinta federaalka ayaa ku tilmaamay joogitaanka ciidamadii hore ee Puntland ee Laascaanood mid sharci ah, oo ujeeddadiisu tahay xasillinta gobolka hoos yimaada dowladda dhexe.

GAROWE ONLINE