Qarax Is-miidaamin ah oo Ka Dhacay Kuliyadda Jaalle Siyaad ee Muqdisho

Muqdisho, Luulyo 9, 2025 – Qarax is-miidaamin ah ayaa subaxnimadii Arbacada Maantaah ka dhacay agagaarka Kuliyadda Jaalle Siyaad ee magaalada Muqdisho, iyadoo wararka hordhaca ah ay sheegayaan in uu sababay khasaare dhimasho iyo dhaawac leh.

Ilo-wareedyo amni ayaa xaqiijiyay in qof is-miidaamiye ah uu isku qarxiyay maqaaxi shaah laga cabo oo ku taalla nawaaxiga Kuliyadda, gaar ahaan meel si gaar ah ay u isticmaalaan ciidamada dowladda. Qaraxa ayaa dhacay waxyar ka hor 11:00 subaxnimo, saacadda Muqdisho.

Goobjoogayaal ayaa sheegay in qaraxa uu sababay dhimasho iyo dhaawac, inkasta oo aan si rasmi ah loo shaacin tirada dadka ku waxyeelloobay. “Waxaa jiray dad dhintay iyo qaar dhaawac ah, waxay ahayd jug weyn oo si cad looga maqlay xaafadaha u dhow,” ayuu yiri mid ka mid ah dadka deegaanka oo goobta ku sugnaa xilliga qaraxa dhacay.

Wasaaradda Gaashaandhigga Soomaaliya ayaa xaqiijisay in qarax is-miidaamin ah uu ka dhacay agagaarka Jaalle Siyaad, iyadoo sheegtay in baaritaanno socdaan, faah-faahin dheeraad ahna la bixin doono marka xogta la helo.

Kooxda Al-Shabaab ayaa si degdeg ah u sheegatay mas’uuliyadda weerarka, iyadoo sheegtay in ay beegsatay ciidamo ku sugnaa meel u dhow Kuliyadda Jaalle Siyaad. Al-Shabaab, oo xiriir la leh Al-Qaacida, ayaa si joogto ah u weerarta saldhigyada ciidamada iyo xarumaha dowliga ah ee caasimadda.

Weerarkan ayaa imaanaya xilli ay xasillooni u muuqatay in ay kusoo laabatay magaalada Muqdisho, kadib bilooyin uu yaraaday weerarrada is-miidaaminta ah. Si kastaba ha ahaatee, falalka noocan oo kale ah ayaa muujinaya halista weli ka jirta dhinaca amniga ee caasimadda.

Ilaa hadda ma jiro war rasmi ah oo laga helay tirada saxda ah ee dadka ku dhintay ama ku dhaawacmay qaraxa. Ciidamada ammaanka ayaa xirtay goobta, waxayna wadaan baaritaanno ku saabsan sida uu weerarka u dhacay iyo cidda lala beegsaday.

GAROWE ONLINE