Qarax saddex qof ku dilay degmada Kaxda ee Muqdisho
-
WARIYAHA MUQDISHO GAROWE ONLINE
- Posted On 05-05-2021, 01:07PM
MUQDISHO, Soomaaliya - Ugu yaraan saddex qof ayaa waxay ku nafweyday, ruux kalana wuu ku dhaawacmay qarax miino oo Arbacada maanta ah ka dhacay degmada Kaxda ee magaalada Muqdisho.
Illo wareedyo dhanka ammaanka ah ayaa u sheegay warsidaha Garowe Online in qaraxa lala beegsaday gaari noociisu yahay Land Cruiser. Balse, wali lama aqoonsan waxay ahaayeen dadka saarnaa.
"Saddex qof ee ku dhimatay falka iyo ruuxa kale ee dhaawacmay oo haweenay ahayd waxay dhamaantooda saarnaayeen gaariga," ayuu yiri mid kamid ah illo wareedyadda u waramay GO.
Ma jirto koox illaa haatan dusha saaratay mas'uuliyadda qaraxa. Balse, waxaa dhacdooyinka noocaan ah looga bartay maleyshiyada Al-Shabaab ee gacansaarka la leh shabakada Al-Qaacidda.
"Ciidamadda dambi-baarista oo daqiiqado kadib yimid goobta qaraxu ka dhacay waxay sameeyeen baaritaan aan lasoo bandhigin natiijadda kasoo baxdey," ayay raaciyeen illo wareedyadda.
Qaraxaan ayaa kusoo aadaya xilli Muqdisho ay wajaheyso khilaaf siyaasadeed oo salka ku haya qabsoomida doorashooyinka iyo xaalad ciidan oo ka dhalatay is-mari-waagaas daba-dheeraadey.
Doorashooyinka Soomaaliya ayaa qorshaha wuxuu ahaa in ay qabsoomaan dhamaadka 2020 iyo horaanta 2021, hase ahaatee, waxaa dib-u-dhigay heshiis la'aanta lagu eedeeyay maamulka Farmaajo.
GAROWE ONLINE
