Qorshe loo dajinayo xakameynta qaraxyadda Soomaaliya

Ilaa 501 qof oo rayid ah ayaa lagu dilay ama lagu dhaawacay Soomaaliya sanadka 2020 sababo la xiriira walxaha qarxa.

MUQDISHO, Soomaaliya – Hawlgalka Midowga Afrika ee KMG ah ee Soomaaliya (ATMIS) ayaa ku baaqay dadaallo wadajir ah oo ay sameeyaan dhammaan dhinacyada ay khusayso iyo bulshada deegaanka si looga hortago khatarta ka imanaysa walxaha qarxa (IEDs).

Diomede Ndegeya, taliyaha Ciidanka ATMIS ayaa sheegay in khatarta ka imanaysa IEDs ay waajib ku tahay howlgalka iyo la-hawlgalayaasheeda si ay ula yimaadaan tillaabooyin cusub oo ka hortagga IED.

"Si loo yareeyo khatarta IED waxay u baahan doontaa jilayaasha militariga ee ku lug leh maamulada Soomaaliya iyo la shaqeynta bulshada, xoojinta dowladnimada, iyo taageeridda dadaallada xasilinta," ayuu ku yiri bayaan ka soo baxay ATMIS ka dib markii dhammaaday shir saddex maalmood ka socday Caasimada Soomaaliya ee Muqdisho.

Shirkan oo ay ka soo qayb galeen saraakiil sarsare oo ka kala socday ATMIS, Hay’adda Qaramada Midoobay u qaabilsan Waxqabadka Miinada (UNMAS) iyo daneeyayaasha muhiimka ah ayaa qiimayn ku sameeyay tallaabooyinka hadda la qaadayo ee lagaga hortagayo IEDs si loo sameeyo istaraatiijiyad dhamaystiran oo lagaga hortagayo khatarta IED.

Ndegeya ayaa sheegay in loo baahan yahay in la qiimeeyo howlgallada, iyadoo la eegayo xal u helida caqabadaha ka dhalan kara qaraxyada.

Waxa uu sheegay in inkasta oo ay jiraan dadaallo ay UNMAS ku doonayso in ay kor ugu qaaddo awoodda ka-hortagga IED ee howlgalka iyada oo loo marayo tababbarka, la-talinta, iyo taageerada qalabka, IED-yadu waxa ay sii wadaan in ay keenaan khatar weyn.

"Awoodeena inaan la imaano iyo xal aan kor u qaadno awoodeena ka hortagga IED waxay muhiim u tahay horumarinta waajibaadka howlgalka," Ndegeya ayaa yiri.

Shirkan ayaa waxaa ka soo qeyb galay ciidamada ammaanka Soomaaliya, howlgalka tababarrada Midowga Yurub ee Soomaaliya (EUTM Soomaaliya), Kooxda Taageerada UK-Mission (UK-MST) ee ATMIS, iyo hay’ado kale.

Madaxa UNMAS ee qaybta barnaamijka, Simon Porter, ayaa ku baaqay in si degdeg ah loo fuliyo talooyinka iyo qorshayaasha laga soo saaray shirka si loo xoojiyo fulinta waajibaadka hawlgalka, iyadoo la eegayo waqtiyada adag ee ku xusan Qaraarka Golaha Ammaanka ee Qaramada Midoobay ee tirsigiisu yahay 2628 ee ku saabsan kala guurka muddada Soomaaliya.

Madaxa Hay’adda UNMAS ee Barnaamijka Waxqabadka Miinada, Jean Guy Lavoie, ayaa xusay in shirku uu ahaa fursad ku habboon ka qaybgalayaasha si ay uga soo saaraan xalal cusub oo looga hortagayo khatarta ka imanaysa Soomaaliya.

Ilaa 501 qof oo rayid ah ayaa lagu dilay ama lagu dhaawacay Soomaaliya sanadka 2020 sababo la xiriira walxaha qarxa iyo haraadiga qaraxyada halka tirada dhaawacyada ay gaartay 669 dhaawac sanadkan 2021, sida ay sheegtay Qaramada Midoobay.

GAROWE ONLINE