Saameynta Türkiye ee Soomaaliya oo Gaartay Heer Xilalka Ugu Sarreeya Dalka Loo Magacaabo Siyaasiyiin Xiriir Toos ah la Leh Ankara

MUQDISHO — Doorashada Maxamed Cabdulqaadir Maxamed ee guddoomiyaha Golaha Shacabka ee Baarlamaanka Federaalka Soomaaliya ayaa markale indhaha ku soo jeedisay saameynta sii ballaaranaysa ee Türkiye ku leedahay siyaasadda iyo hay’adaha dowladda Soomaaliya, xilli muddo-xileedka hay’adaha dowladda federaalka uu dhammaaday.

Maxamed Cabdulqaadir, oo hore xilal kala duwan uga soo qabtay dowladda federaalka, ayaa muddo dheer xiriir dhow la lahaa Türkiye.

Xiriirkaas ayaa soo bilowday xilli wasiirkii hore ee Dekedaha Soomaaliya uu sarkaal sare ka ahaa safaaradda dowladda Soomaaliya ku leedahay dalka Türkiye. Waxaa jira xogo aan si madax-bannaan loo xaqiijin oo sheegaya inuu intii uu joogay Ankara ku biiray hay’adaha sirdoonka dalkaas.

Doorashadiisa ayaa sidoo kale kusoo beegmaysa xilli xiriirka Ankara iyo Muqdisho uu gaaray heerkii ugu sarreeyey.

Kahor inta uusan kusoo biirin siyaasadda Soomaaliya, Maxamed Cabdulqaadir ayaa xubin ka ahaa kooxaha amniyaadka ee ururka Al-Shabaab.

Türkiye ayaa door weyn ku leh tababarka ciidamada, amniga, dekedaha, kaabayaasha dhaqaalaha iyo mashaariicda tamarta Soomaaliya.

Türkiye waxay Muqdisho ku leedahay saldhigga tababarka ciidamada ee TURKSOM, waxaana dalkaas lagu tababaray kumannaan askari iyo saraakiil Soomaaliyeed, oo qaarkood markii dambe gaaray xilal sare oo ciidamada ah.

Sida uu sheegay sarkaal sare oo ka tirsan Villa Somalia, Ankara ayaa sidoo kale Madaxweyne Xasan Sheekh Maxamuud ku cadaadisay in la dallacsiiyo saraakiil sare oo tababar ku soo qaatay Türkiye.

Haddii taageerada ciidan ee dibadda ay bilowdo inay saameyn ku yeelato cidda ka dhex dallacaysa hoggaanka ciidamada Soomaaliya, arrintu kuma eka oo keliya dhismaha awoodda ciidamada. Waxay dhalinaysaa su’aalo culus oo ku saabsan madax-bannaanida hay’adaha iyo go’aan-qaadashada qaranka.

Shirkado Turkish ah ayaa sidoo kale maamula kaabayaal muhiim ah oo Muqdisho ku yaalla, halka labada dowladood ay sanadihii dambe kala saxiixdeen heshiisyo dhinacyada difaaca, badda iyo tamarta ah.

Doorashadan ayaa dhacday iyadoo Soomaaliya ay weli ka jirto khilaaf xooggan oo ku saabsan muddo-xileedka hay’adaha federaalka iyo hannaanka doorashooyinka uu wado Madaxweyne Xasan Sheekh Maxamuud.

Puntland, Jubaland iyo qaar ka mid ah mucaaradka siyaasadeed ayaa kasoo horjeeda hannaankaas, iyagoo ku eedeeyey Xasan Sheekh muddo-kororsi sharci-darro ah, halka uu damacsan yahay inuu qabto doorasho aan heshiis lagu ahayn.

Türkiye, oo ka mid ah dowladaha xiriirka ugu dhow la leh Villa Somalia, si cad uma aysan muujin walaac ku saabsan muranka muddo-xileedka hay’adaha dowladda oo dhammaaday, iyadoo Ankara ay sii wadday xiriirkeeda siyaasadeed, dhaqaale iyo amni ee maamulka Xasan Sheekh.

Doorashada loo doortay xilka Guddoomiyaha Golaha Shacabka Soomaaliya, oo muddo-xileedkiisu dhammaaday, ayaa waxaa si buuxda ugu lug lahaa dowladda Türkiye, iyadoo madax sare u soo dirtay Muqdisho muddadii uu socday ololaha kursigan.

Maxamed Cabdulqaadir — oo lagu tilmaamo inuu muddo dheer xiriir dhow la lahaa Ankara — doorashadiisa ayaa markale iftiimisay sida saameynta Türkiye ee Soomaaliya uga soo gudubtay gargaarka, horumarinta iyo tababarka ciidamada, una gaartay xarumaha ugu sarreeya siyaasadda iyo go’aan-qaadashada dowladda.

GAROWE ONLINE