Amaro la dul dhigay Safiirada Somalia u fadhiya Dibadda [Akhri]
-
- Posted On 07-09-2017, 01:26PM
MUQDISHU, Somalia - Dhamaan Safiirada, Ergooyinkja joogtada iyo Qunsullada Somalia u fadhiya dibadda inaysan la hadli karin Warbaahinta, iyagoo ogolaansho ka haysan xarunta Wasaaradda Arrimaha Dibadda.
Warqad kasoo baxday Wasaaradda Arrimaha Dibadda, islamarkaana uu ku saxiixan yahay Cali Maxamed Cali, Xoghayaha joogtada Wasaaradda, ayaa lagu shaaciyay amarkan cusub.
Qoraalkan oo Nuqul kamid ah uu helay Warsidaha Garowe Online, ayaa lagu sheegay in dadka Darajadooda ka hooseyso Danjire, Ergay joogto ama Qunsul aysan la hadli karin nooc kasta oo Warbaahin ah, gudaha iyo Dibadda intaba.
Amarkan ayaa yimid kadib markii Yuusuf Garaad Cumar, Wasiirka Arrimaha Dibadda uu bishii lasoo dhaafay Warqad uu u qoray Safiirka Mareykanka u fadhiga Somalia, Stephen Schwartz, taasi oo dowladda Somalia uga codsatay Mareykanka taageero Military.
Yuusuf Garaad ayaa Qoraalka uu diray Mareykanka ku sheegay in Al shabaab ay dhul badan oo qani ku ah Macdanta Yuraanuyaamka kala wareegtay Galmudug, islamarkaana ay u dhoofinayso dalka Iran.
Axmed Ciise Cawad, oo ah Safiirka Somalia u fadhiya Mareykanka ayaa xaqijiyay qoraalkaasi uu soo saarey Yuusuf Garaad inuu yahay mis sax ah, oo dowladda Federaalka taageero military ku waydiisatay Mareykanka.
Wasiir Yuusuf Garaad ayaa qoraalkan uu soo saarey kala kulmay canaan xooggan, xilli uu Ra'iisul Wasaare Khayre uu ka mamnuucay Wasiiradiisa inay ka hadlaan arrimaha xasaasiga ah iyagoo aan ogolaansho ka haysan Xafiiskiisa.
GAROWEONLINE
