Soomaaliya : Shirka Warbaahinta oo Muqdisho ka Furmay Xilli Walaac Jiro

MUQDISHO, Soomaaliya — Magaalada Muqdisho waxaa maanta ka furmay shir loogu magac-daray Shirweynaha Qaran ee Istiraatiijiyadda Xiriirka Warbaahinta 2026 (Strategic Communication Forum 2026), oo ay Dowladda Federaalka muddo-dhaafka ah sheegtay in looga hadlayo mustaqbalka warbaahinta Soomaaliya, xiriirka dowladda iyo warbaahinta, baraha bulshada, garaadka macmalka ah (AI), anshaxa saxaafadda iyo waxa ay dowladdu ku tilmaantay wararka khaldan iyo kuwa been-abuurka ah.

Shirka oo soconaya 7–8 September, ayna qabanqaabisay Wasaaradda Warfaafinta, ayaa halku-dhiggiisu yahay “Qaabeynta Mustaqbalka Warbaahinta ee Xilligan Casriga ah.” Dowladda ayaa sheegtay in ujeeddadu tahay horumarinta xiriirka dowladda iyo warbaahinta, isku-duwidda isgaarsiinta iyo dhisidda kalsoonida bulshada.

Shirkan ayaa ku soo beegmaya xilli dalka ay ka jirto xiisad siyaasadeed oo xooggan, isla markaana aan la isku waafaqsanayn sharciyadda hay’adaha Dowladda Federaalka kadib dhammaadka muddo-xileedkooda. Waxaa sidoo kale sii xumaanaya xiriirka Muqdisho iyo qaar ka mid ah dowlad-goboleedyada; qaybo dalka ka mid ah waxaa ka socda iska-horimaadyo siyaasadeed iyo kuwo hubeysan, halka maamullo kalena uusan xiriir siyaasadeed oo rasmi ahi kala dhaxayn Dowladda Federaalka.

Waxaa taas barbar socda walaac ay ururrada difaaca saxafiyiinta iyo xorriyadda hadalku ka muujiyeen xaaladda ay ku shaqeeyaan warbaahinta madaxa-bannaan ee Soomaaliya.

Somali Journalists Syndicate (SJS) ayaa 30-kii August soo saartay baaritaan ay ku sheegtay in saxafiyiin iyo warbaahin madaxa-bannaan ay la kulmeen sheegashooyin xuquuqda daabacaadda oo been-abuur ah, in waxyaabaha ay baahiyaan laga saaro baraha bulshada iyo xannibaado lagu sameeyo akoonnadooda. SJS waxay sidoo kale soo bandhigtay eedeymo sheegaya in magacyada saxafiyiin iyo waxyaabo ay baahiyeen loo gudbiyey Wasaaradda Warfaafinta iyo Hay’adda Isgaarsiinta Qaranka (NCA), isla markaana lala xiriiray Facebook si qaar ka mid ah waxyaabahaas looga saaro madasha.

Bishii April, SJS ayaa sidoo kale sheegtay inay heshay warbixinno tilmaamaya in masuuliyiin dowladeed ay ka wada hadleen tallaabooyin laga qaadayo qaar ka mid ah warbaahinta iyo saxafiyiinta dhaliila dowladda, iyadoo qaar ka mid ah xarumaha warbaahintu ururka u sheegeen inay hanjabaado kala kulmeen masuuliyiin sare.

Dhanka kale, NUSOJ ayaa bishii June walaac ka muujisay qabyo-qoraalka Xeerka Ciqaabta, gaar ahaan qodobo la xiriira wararka loo aqoonsado “been-abuur ama marin-habaabin”, sumcad-dilka hay’adaha dowladda iyo hadallada internet-ka, kuwaas oo ururku sheegay inay khatar gelin karaan xorriyadda hadalka iyo saxaafadda.

Sidaas darteed, doodaha shirweynaha ee ku saabsan wararka been-abuurka ah, baraha bulshada iyo xiriirka dowladda iyo warbaahinta ayaa imanaya iyadoo ay jiraan su’aalo ku saabsan sida qorshayaasha cusub loogu kala xadidi doono istiraatiijiyadda isgaarsiinta dowladda iyo madax-bannaanida warbaahinta.

Natiijada iyo talooyinka kasoo baxa shirweynaha labada maalmood socda ayaa la filayaa inay sawir dheeraad ah ka bixiyaan jihada Dowladda Federaalka muddo-dhaafka ah ee xiriirka iyo istiraatiijiyadda warbaahinta.

GAROWE ONLINE