Soomaaliya: Wasiirka Gargaarka Puntland oo Beenisay hadal kasoo yeeray SoDMA

Garowe, Puntland – Wasiirka Gargaarka iyo Maareynta Masiibooyinka Puntland, Ubah Abdirashid Mohamed Hersi, ayaa Sabtidii si kulul u beenisay sheegashada ay soo saartay Hay’adda Maareynta Masiibooyinka Qaranka Soomaaliya (SoDMA), taasoo ku saabsan in gargaarka ay sheegtay in gaarsiisay Puntland.

Wasiir Ubah ayaa ugu baaqday deeq bixiyayaasha caalamiga ah "in ay si toos ah ula shaqeeyaan" masuuliyiinta dowlad-goboleedka Puntland ee ku saabsan gurmadka bani’aadanimo. Waxay sidoo kale ku eedeysay hay’adda SoDMA in ay "gargaarka u leexisay siyaasiyiin maxalli ah si ay u helaan faa'iido siyaasadeed."

Waxay sidoo kale tilmaantay in Puntland ay wajaheyso caqabado adag oo bani’aadamnimo, kuwaas oo ka dhashay abaaro daba dheeraaday, sicir barar ba’an, iyo xaaladaha dhaqaale ee sii xumaanaya. Wasiirku waxay ku adkeysatay baahida loo qabo wada-shaqeyn hufan oo u dhaxeysa deeq-bixiyayaasha iyo maamullada maxalliga ah si dadka dhibaateysan loogu gaarsiiyo gargaarka si caddaalad leh.

"Ma aqbali karno in dadka Puntland lagu tacadiyo iyadoo gargaarkii loogu talagalay loo adeegsanayo dano siyaasadeed. Waa in la xaqiijiyaa in gargaar kasta oo la keeno uu gaaro dadka ugu nugul," ayay tiri Wasiirka.

Warbixintan ayaa sii xoojinaysa khilaafka u dhaxeeya maamulka Puntland iyo hay’adaha federaalka ee ku saabsan maaraynta gargaarka iyo masiibooyinka, iyadoo sidoo kale abuurtay su’aalo ku saabsan hufnaanta iyo isla xisaabtanka nidaamyada loo isticmaalo qaybinta gargaarka Soomaaliya oo dhan.

Waxaa sidoo kale la filayaa in beesha caalamka ay dhexdhexaadin ku sameyso khilaafkan si loo hubiyo in shacabka Soomaaliyeed aysan ku dhex lumin khilaafaadka siyaasadeed ee jira.

GAROWE ONLINE