STC oo Ballaarisay Gacanta ay ku Hayso Koonfurta Yemen

Golaha xiliga kala guurka Koonfurta Yemen (Southern Transitional Council – STC) ayaa ku dhawaaqay inuu si buuxda ula wareegay deegaanno ballaaran oo ka tirsan koonfurta Yemen, oo ay ku jirto magaalada istaraatiijiga ah ee Cadan. Tallaabadan ayaa lagu tilmaamay mid wax weyn ka beddelaysa jihada colaadda muddada dheer ka socotay dalkaas.

Magaalada Cadan ayaa muddo sanado ah ahayd xarunta ku-meel-gaarka ah ee dowladda Yemen ee caalamku aqoonsan yahay, taas oo taageero ka haysata Sacuudiga. STC, oo u ololeysa dib u soo celinta maamul madax-bannaan oo Koonfurta Yemen ah, ayaa sheegtay in mas’uuliyiin sare ay ka baxeen magaalada kadib horumarka milatari ee ay sameeyeen.

STC waxay sheegtay in Ra’iisul Wasaaraha iyo madaxa Golaha Hoggaanka Madaxtooyada ay ka tageen Cadan, inkastoo aan la weydiin halka ay u baxaan. Madaxweynaha Golaha Hoggaanka Madaxtooyada, Rashad al-Alimi, ayaa dhankiisa ku tilmaamay tallaabooyinka STC kuwo dhaawacaya heshiisyadii wadaagga awoodda iyo sharciyadda dowladda la aqoonsan yahay.

Golaha STC waxaa taageera Imaaraadka Carabta (UAE), wuxuuna marar hore dagaallo la galay kooxo kale oo ka tirsan dhinacyada dowladda ay Sacuudigu taageerto. Tan iyo sanadkii 2022, STC waxay ka mid ahayd maamulka ka taliya inta badan koonfurta Yemen, meelaha ka baxsan gacanta Xuutiyiinta, kuwaas oo haysta caasimadda Sanca tan iyo 2014.

Toddobaadkii la soo dhaafay, STC waxay billowday hawlgal milatari ay ugu magac-dartay “Mustaqbal La Hubsaday”, iyadoo sheegtay inay la wareegtay dhammaan gobollada koonfurta. Mas’uuliyiin ka tirsan STC ayaa sheegay in hadafka xiga uu yahay mideynta hawlgallada militari, xoojinta amniga iyo diyaar garowga, iyo suurtagal ahaan wajahidda Xuutiyiinta haddii go’aan noocaas ah la gaaro.

Horumarkan cusub ayaa muujinaya isbeddel weyn oo ku yimid khariidadda awoodda Yemen, xilli dalka uu ku jiro sanadkiisii tobnaad ee colaadda hubeysan.

GAROWE ONLINE