Swan: Madaxda Soomaalida waa in ay si dhaqso ah u kulmaan

Dhawaqan ayaa kusoo beegmaya xilli isha lagu hayo qabsoomida shirka Golaha Wadatashiga Qaranka oo mugdi uu ku jiro.

MUQDISHO, Soomaaliya - Cimilada siyaasadda Soomaaliya ayaa hada ah mid ku habboon in wax laga qabto arrimaha hor-tebinta qaranka, sidda uu sheegay James Swan, wakiilka Qaramada Midoobay ee Soomaaliya.

"Si fursaddan looga faa’ideysto, mas’uuliyiinta federaalka iyo dowlad goboleedyada waa in ay si dhow isula shaqeeyaan si horumar looga gaaro himilooyinka dowladda cusub, oo ay ku jiraan hagaajinta garsoorka iyo dowladnimada, in si wax-ku-oolnimo leh looga hortago Al Shabaab, iyo in si degdeg ah wax looga qabto dhibaatooyinka bini’aadannimo ee sii xumaanaya," ayuu raaciyey.

Inkasta oo madaxwayne Xasan Sheekh oo la doortey 15-kii May, 2022 uu xarumaha maamulada ku tagay booqashooyin loo arkay mid uu ku qaboojinayo xaaladda, haddana xiriirka ayaan wali ahayn mid fadhiya.

Swan oo Arbacadii shalay ahayd warbixin siiyey Golaha Ammaanka ee Jamciyada Qurumaha Ka Dhaxeysa ayaa ku tartarsiiyey hogaamiyeyaasha Soomaalida in ay "mar kale si dhaqso ah kulmaan".

"Qaramada Midoobay waxay Dowladda kala shaqaynaysaa taageeridda shirkan muhiimka ah," ayuu raaciyey isaga oo aan bixin fahfaahin ku saabsan kaalinta ay ka cayaari karaan qabsomida is-araggan.

Dhawaaqan ayaa kusoo beegmaya xilli madaxwayne Xasan Sheekh uu madaxwayneyaasha maamul goboleedyadda gaarsiiyey fariin ku saabsan kasoo qeybgalka kulanka Golaha Wadatashiga Qaranka.

Garowe Online ayaa fahansan in madaxda dowlad goboleedyadda aysan wali ka jawaabin martiqaadkaas. Kulankan ayaa la qorsheeyay in uu Muqdisho ka qabsoomo bartamahan bishan bilowga ah ee September.

Madaxwayne Xasan ayaa u doonaya qabsoomida kulankan si uu fasiraad ugu helo hal-ku-dhiga uu ololaha ku galay ee "Soomaali heshiis ah dunidana heshiis la ah" kahor kulanka loo dhan yahay ee Qaramada Midoobay.

GAROWE ONLINE