Taageero degdeg ah oo loo raadinayo Ciidamada AUSSOM ee Soomaaliya

MUQDISHO — Dowladda Federaalka Soomaaliya, Howlgalka Taageerada iyo Xasilinta Midowga Afrika ee Soomaaliya (AUSSOM) iyo Xafiiska Taageerada Qaramada Midoobay ee Soomaaliya (UNSOS) ayaa si wadajir ah ugu baaqay deeq-bixiyeyaasha caalamka in ay si degdeg ah u bixiyaan kaalmo dhaqaale si loo sii wado taageerada lagama maarmaanka u ah Ciidamada Amniga Soomaaliyeed.

Baaqan ayaa lagu jeediyay munaasabad lagu qabtay Muqdisho Talaadadii, taas oo la xiriirtay Sanduuqa Kalsoonida Ciidamada Amniga Soomaaliyeed (SSF Trust Fund).

Kulanka waxaa ka qeyb galay La-taliyaha Amniga Qaranka Soomaaliya, masuuliyiin sare oo ka socday AUSSOM iyo UNSOS, oo ay ku jiraan Wakiilka Gaarka ah ee Xoghayaha Guud ee Qaramada Midoobay (SRSG) iyo Ku-simaha Madaxa UNSOS, iyo sidoo kale safiirro iyo wakiillo ka socda beesha diblomaasiyadda. Sidoo kale waxaa joogay saraakiil sare oo ka tirsan Ciidamada Xoogga Dalka Soomaaliyeed, Booliska Soomaaliya, Wasaaradda Gaashaandhigga, Wasaaradda Amniga Gudaha iyo Xafiiska Amniga Qaranka.

Ka qeybgalayaashu waxay adkeeyeen doorka muhiimka ah ee Sanduuqa SSF Trust Fund uu ka ciyaaro sii wadista howlgallada amni ee ay hoggaaminayaan Soomaalidu, iyagoo carrabka ku adkeeyay baahida degdegga ah ee loo qabo tabarucaad ikhtiyaari ah si loo ilaaliyo joogteynta hawlgallada.

Masuuliyiintu waxay sheegeen in bixinta taageerada nolosha aasaasiga ah ee ciidamada — oo ay ka mid yihiin 540 tan oo raashin ah, 180,000 litir oo shidaal ah, iyo adeegga daad-gureynta caafimaad ee cirka 24-saac ah — ay u baahan tahay ku dhowaad $1.2 milyan bishii, halka taageerada buuxda ee waajibaadka loo xilsaaray ay ku kacayso qiyaastii $2.3 milyan bishii.

Iyadoo loo marayo Sanduuqa SSF Trust Fund, UNSOS ayaa bixisa taageero saadka iyo hawlgal ee Ciidamada Amniga Soomaaliyeed ee wada ama iskudubarid la sameeya AUSSOM. Taageerada waajibaadka ah waxaa ka mid ah raashin, shidaal, daad-gureyn caafimaad, gaadiid, qalabka isgaarsiinta, agabka difaaca, iyo teendhooyin loogu talagalay saldhigyada hore ee howlgallada.

UNSOS waxay xustay in inta badan taageeradan hadda laga soo iibiyo suuqyada gudaha Soomaaliya, taas oo gacan ka geysaneysa kobcinta dhaqaalaha maxalliga ah isla markaana xoojinaysa lahaanshaha qaran ee dadaallada amniga.

Sanduuqa SSF Trust Fund, oo ku dhisan iskaashiga saddex-geesoodka ah ee Dowladda Federaalka Soomaaliya, AUSSOM iyo UNSOS, ayaa weli ah hannaan muhiim ah oo lagu gaarsiiyo ciidamada taageerada nolosha aasaasiga ah, si waafaqsan mudnaanta qaranka.

Khudbadihii munaasabadda laga jeediyay ayaa muujiyay mahadnaq ballaaran oo loo jeediyay deeq-bixiyeyaasha iyo saaxiibada jira, iyadoo isla markaasna la adkeeyay baahida tallaabo degdeg ah loo qaado si loo sii wado hawlgallada. Taageerada joogtada ah, ayay sheegeen, waa mid lama huraan u ah ilaalinta ciidamada Soomaaliyeed ee ku sugan jiidaha hore iyo ilaalinta guulaha laga gaaray nabadda iyo xasilloonida.

Dalalka iyo saaxiibada taageera Soomaaliya waxaa ka mid ah Boqortooyada Ingiriiska, Mareykanka, Sweden, Jabuuti, Itoobiya, Midowga Yurub, Talyaaniga, Kenya, Qatar, Türkiye, Uganda, Ireland, Switzerland, Canada, Faransiiska, Ruushka, Denmark iyo Japan.

GAROWE ONLINE