Kheyre oo Muqdisho ka furey Shirka Kooxda Xiriirka Soomaaliya ee OIC

MUQDISHO, Soomaliya - Ra'iisul Wasaaraha Xukuumadda, Xasan Cali Kheyre ayaa goordhow ka furey Shirka Kooxda Xiriirka Soomaaliya ee Ururka Iskaashiga Islaamka magaalada Muqdisho, gaar ahaan xarunta Xalane.

Kheyre ayaa khudbadiisa diiradda ku saarey waxqabadka xukuumadiisa mudadii ay jirtay, isagoo uguu baaqey dalalka Ururka Iskaashiga Islaamka inay maalgashi ku sameeyaan dalka, islamarkaana kaalintooda ka qaataan dib usoo kabashada dalka.

Shirkan oo ah midkiisii ugu horeeyay oo lagu qabto Soomaaliya tan iyo markii la aas-aasay Kooxdan 10 sano kahor, waxaana lagu soo waramayaa in qaar kamid ah wufuudda 15-ka dal ee la sugayay ay ka baaqdeen ka qeybgalkiisa.

Horey waxaa loogu qaban jirey Shirka Kooxda xiriirka Soomaaliya ee OIC magaalada New York, ee dalka Mareykanka, waxaana dedaal ay sameysay Wasaraadda arrimaha dibadda Xukuumadda lagu guuleysty in lagu qabto Caasimadda.

Waxa uu kusoo beegmayaa shirka xilli khilaaf siyaasadeed xooggan uu dheexayo dowladda Federaalka ah ee Soomaaliya iyo maamul goboleedyada, oo dhawaan shaaciyay inay dhisanayaan ciidamo u gaar ah, kuna dhawaaqay shir weyne qaran.

GAROWE ONLINE