Warbixin: Doorashada Lagu Muransan Yahay ee Muqdisho oo Heer Cusub Gashay

Muqdisho – Guddoomiyaha Guddiga Doorashooyinka lagu muransan yahay, Cabdikariin Axmed, ayaa si rasmi ah u shaaciyay inay dhamaatay diiwaangelinta doorashada qof iyo codka ah ee degmooyinka gobolka Banaadir, arrintaasoo ku soo beegmaysa iyadoo muran iyo khilaaf xoogan uu ka taagan yahay hannaanka doorashooyinka dalka.

Guddoomiye Cabdikariin ayaa sheegay in ku dhawaad hal milyan oo qof laga diiwaangeliyay magaalada Muqdisho, kuwaas oo la filayo inay codeeyaan doorashada lagu wado in la qabto 30-ka bisha October 2025. Wuxuu xusay in dadkaasi ay dooran doonaan Golaha Deegaanka iyo Duqa magaalada Muqdisho, isagoo intaas ku daray in liiska codbixiyeyaasha la shaacin doono 27-ka bishan.

“Hoggaamiyeyaasha Muqdisho waxay fursad u heli doonaan inay codkooda dhiibtaan markii ugu horreysay si toos ah. Tani waa guul u ah dimuqraadiyadda Soomaaliya,” ayuu yiri Cabdikariin.

Si kastaba ha ahaatee, doorashadan ayaa si weyn loogu muransan yahay, iyadoo xubno mucaarad ah iyo madaxda maamul goboleedyada Jubbaland iyo Puntland ay si cad uga soo horjeesteen. Waxay ku doodayaan in aysan jirin jawi amni iyo mid siyaasadeed oo doorasho qof iyo cod ah lagu qaban karo waqtigan.

Khilaafka ka taagan guddiga doorashada iyo qaabka loo maamulayo geedi-socodka doorashooyinka ayaa sidoo kale sii hurinaya hubanti la’aanta siyaasadeed ee dalka. Jubbaland iyo Puntland ayaa horey u sheegay inaysan aqbali doonin natiijo kasta oo ka timaada doorasho ay ku tilmaameen mid “qorsheysan oo aan lagu heshiin.”

Dhanka kale, Guddoomiyaha Guddiga Doorashooyinka Qaranka ayaa xusay in howlaha diiwaangelinta ay wali ka socdaan magaalooyinka Laascaanood ilaa Xudur, waxaana la filayaa in wejigii hore ee diiwaangelinta lagu soo gabagabeeyo maalmaha soo socda.

Dowladda Federaalka Soomaaliya ayaa ku adkeysanaysa in doorasho qof iyo cod ah laga hirgeliyo dalka, balse waxaa muuqata caqabado siyaasadeed iyo kuwo amni oo wali hortaagan qabsoomideeda si hufan.

GAROWE ONLINE