Warbixin: Duqeymaha Mareykanka ee Soomaaliya oo lagu dilay 174 qof sanadkan 2025

WASHINGTON - Warbixin cusub oo kasoo baxday Hay’adda New America Foundation ee fadhigeedu yahay Washington, ayaa sheegtay in duqeymo diyaaradeed oo ay fuliyeen ciidamada Mareykanka ee Soomaaliya sanadkan 2025 ay dileen ilaa 174 qof.

Warbixintu waxay tilmaamaysaa in duqeymahaasi ay ahaayeen 34 duqeyn oo lagu beegsaday Al-Shabaab iyo Daacish. Si kastaba ha ahaatee, hay’addu ma aysan faahfaahin tirada dadka rayidka ah ee ku dhintay duqeymahaas.

Mudo-xileedkii hore ee Madaxweyne Donald Trump [2017-2021], AFRICOM waxay fuliyeen 219 duqeyn oo Soomaaliya ka dhacay, kuwaas oo lagu dilay 6 ilaa 31 qof oo rayid ah.

Duqeymaha Mareykanka ee Soomaaliya ayaa inta badan lagu beegsanayaa Al-Shabaab iyo Daacish. Tusaale ahaan, bishii Janaayo 2025, ciidamada Mareykanka iyo kuwa Soomaaliya ayaa duqeyn ka geystay deegaanka Beer Xaani ee gobolka Jubaland, taas oo lagu dilay 10 xubnood oo ka tirsan Al-Shabaab, oo uu ku jiray hoggaamiye sare oo kooxda ka tirsan.

Sidoo kale, bishii Febraayo 2025, duqeyn ka dhacday buuraha Calmiskaad ee Puntland ayaa lagu dilay xubno sare oo ka tirsan Daacish, oo kamid ahaa Axmed Milaniini, oo madax u ahaa weerarada Mareykanka iyoYurub.

Inkasta oo warbixinnada qaar ay sheegayaan in duqeymaha Mareykanka ay dileen ilaa 174 qof, haddana xogtan ma xaqiijin ilo madax-bannaan. Sida caadiga ah, duqeymaha noocan ah waxay geystaan khasaaro shacabka soo gaara.

Dowladda Soomaaliya iyo AFRICOM waxay ku adkeysanayaan in duqeymaha ay yihiin kuwo lagu beegsanayo kooxaha argagixisada, isla markaana ay ka taxaddarayaan inaysan waxyeello u geysan shacabka. Si kastaba ha ahaatee, waxaa muhiim ah in la helo xog madax-bannaan oo xaqiijinaysa tirada dhimashada iyo saameynta duqeymahaas.

Duqeymaha diyaaradaha Mareykanka ee Soomaaliya ayaa la kordhiyay sanadkan 2025 markii Trump xafiiska yimid, waxay muujinayaan sii xoojinta iskaashiga ka dhexeeya Mareykanka iyo Soomaaliya ee la dagaallanka kooxaha argagixisada.

GAROWE ONLINE