Jamaal oo si fudud ugu guuleystay doorashada Kursiga BF

GAROWE, Puntland - Wasiirka Qorsheynta Soomaaliya, Jamaal Maxamed Xasan ayaa si sahlan ugu guuleystay doorashada Kursi kamid ah Gollaha Shacabka oo maanta lagu qabtey xarunta Aqalka Wakiiladda Puntland ee Garowe.

Doorashada waxaa ku tartamay labo murashax oo kala ahaa Wasiirka Qorsheynta Jamaal Maxamed Xasan iyo Maxamuud Cabdullaahi Maxamed, iyadoo cobxixinta ay ahayd mid natiijadeeda hore loo sii saadaaliyay.

Wasiir Jamaal ayaa helay 49 cod, waxaa xumaaday 2 cod, iyadoo musharaxii la tartamay uusan helin wax cod ah, Maxamuud Cabdullaahi.

Gudoomiyaha Gudiga madaxa-banaan ee doorashooyinka qaranka, Xaliima Yareey ayaa ku dhawaaqday natiijada doorashadii maanta ka dhacday magaalada Garowe, taasii ay goobjoog ahaayeen Xildhibaanno katirsan Baarlamaanka Puntland, Odoyaal dhaqan iyo xubno katirsan qeybaha bulshada.

Kursigan ayaa deegaan-doorashadiisu tahay gobolka Sanaag ee Puntland, waxaana lagu qabtay Garowe.

Xildhibaankii kursigan iska casilay, Dhahar Cali Faarax ayaa loo magacaabay Qunsulka Soomaaliya u fadhiya dalka Jabuuti iyadoo dhinaca kale jireen heshiisyo kale.

Xaliimo Yareey oo Madax ka aheyd  guddiga Doorashada Soomaaliya In muddo ah ayaa iyadu ku shaqeysa awaamiirta Madaxada xiligaaas joogta Villa Somalia taasoo aan marni eegin sharciyada kuraasta lagu tartamayo.

GAROWE ONLINE