Xasan Sheekh oo "loo joojin maayo" ku badalay "sambuus laga aaday"

Madaxweynaha Soomaaliya ayaa dabciyey siyaasadiisa "loo joojin maayo" wallow ay su'aallo ku wareegsan yahay hadalkiisa.

MUQDISHO, Soomaaliya - Madaxweyne Xasan Sheekh Maxamuud, ayaa caawa kulan casho sharaf ah la qaatay Guddoonka iyo Xildhibaannada Labada Aqal ee Baarlamaanka Federaalka Soomaaliya, isagoo gudbiyey codsi ku saabsan kulan gaar ah oo uu ku hortagayo fadhiga Baarlamaanka.

Munaasabadda caawa waxaa ka qeyb-galay Ra'iisul Wasaaraha Xukuumadda Federaalka Soomaaliya, Xamse Cabdi Barre, iyo kuxigeennadiisa, iyo Madaxweyneyaasha Dowlad-goboleedyada; Galmudug, Axmed Cabdi Kaariye; Koonfur-galbeed, Cabdicasiis Xasan Maxamed; iyo Hirshabeelle, Cali Cabdullaahi Xuseen.

Xasan Sheekh ayaa bogaadiyey Madaxda Dowlad-goboleedyada ka qayb-galay Madasha Wadatashiga Qaranka, taasoo lagaga arrinsanayo aayaha iyo horumarka dalkeenna, gaar ahaan dhammaystirka dib-u-xoreynta deegaannada gacanta argagixisada ku jira, adkaynta amniga, dib-u-dhiska Ciidamada Qalabka Sida, iyo xaqiijinta himilada shacabka Soomaaliyeed ee doorashada hoggaankooda.

"Walaalaheen naga aragtida duwan waa la hadlaynaa; haddii ay noo ogolaadaan waan u tagayaa, haddii kalena way noo imaanayaan. Wadajir iyo midnimo ayaan rabaa. Maanta dadkeenna waxaa u furan fursad weyn oo ay ku gaari karaan rajadooda, waxaana si wadajir ah uga shaqeynaynaa adkaynta amniga dalka, dhammaystirka dib-u-xoreynta deegaannada ay ku dhuumaaleysanayaan argagixisadu, iyo xaqiijinta Soomaaliyada ay inaga sugayaan shacabkeennu"

Xasan Sheekh ayaa xusay doorka muhiimka ah ee ay Xildhibaannada Baarlamaanka Federaalka Soomaaliya qaateen muddadii la soo dhaafay, iyagoo dhexda u xirtay qabyo-tirka dastuurka, difaaca iyo adkeynta midnimada dalka, waxa uuna adkeeyey rajada shacabka Soomaaliyeed ee ku aaddan horumarinta dowladnimada.

Sikastaba ha ahaatee, hadalka madaxwayne Xasan Sheekh ee ku aadan inuu wadahadal la galayo Puntland iyo Jubaland ayaa u muuqda mid uu uga soo dabcay siyaasadiisa ahayd "loo joojin maayo" hase ahaatee waxay imaanaysaa iyadda oo horey Puntland u dalbatay taasoo ka dhigaysa "sambuus laga aaday".

GAROWE ONLINE