Xasan Shiikh oo ka soo muuqdey Antalya xilli Soomaaliya ay wajahayso qalalaase amni iyo siyaasadeed

Antalya, Turkiga – Sawir lagu baahiyay baraha bulshada ayaa muujinaya Madaxweynaha Dowladda Federaalka Soomaaliya, Xasan Shiikh Maxamuud, isagoo dul fadhiya mid kamid ah doonyaha raaxada ee ku sugan magaalada Antalya ee dalka Turkiga. Warar xog ogaal ah ayaa sheegaya in madaxweynuhu markii hore booqasho ku tagey dalka Masar, kadibna u sii gudbay Turkiga isagoo halkaas caafimaad u aaday, ugu dambeyntiina gaaray magaalada dalxiiska caan ku ah ee Antalya.

Sawirkan oo aad loogu falceliyay baraha bulshada, ayaa yimid xilli dalka Soomaaliya uu wajahayo xaalado adag oo dhinaca amniga, siyaasadda, iyo faragelinta Federaalka ah.

Weerarro iyo Kacsanaan Amni

Isla waqtigaas, kooxda Al-Shabaab ayaa weerarro qaraxyo ah ku qaaday ciidanka nabad ilaalinta Midowga Afrika ee ku sugan Soomaaliya, gaar ahaan kuwa Uganda. Weeraradan ayaa sababay khasaare xooggan iyadoo sidoo kale Al-Shabaab ay gacanta ku dhigtay magaalooyin istaraatiiji ah oo ku yaalla gobollada Hiiraan iyo Shabeelaha Dhexe.

Faragelinta Federaalka ee Puntland iyo Jubaland

Dhinaca kale, Villa Soomaaliya ayaa lagu eedeeyay faragelin ballaaran oo ka dhan ah maamulada Puntland iyo Jubaland. Magaalada Laascaanood ayaa haatan martigelinaysa shir ay dowladda Federaalka ka waddo si ay u dhisto maamulka Khaatumo, kaas oo la sheegayo in lagu dari doono deegaano ka tirsan Puntland.

Maamulka Puntland ayaa arrintaas ku tilmaamay faragelin sharci-darro ah, iyadoo magaalada Dhahar ay dhawaan ka dhaceen iska horimaadyo sababay dhimasho, kuwaas oo si toos ah loola xiriiriyay shirka Laascaanood.

Dhaqdhaqaaqyada Dowladda Federaalka ee Gobolka Gedo

Wararka kale ayaa sheegaya in Dowladda Federaalka ay ka waddo gobolka Gedo dhaq-dhaqaaqyo ciidan, iyadoo la sheegay in ciidamo cusub lagu daadgureynayo gobolka. Ra’iisul Wasaare Xamsa Cabdi Barre ayaa dhawaan magaalada Muqdisho kula kulmay Cabdirashiid Janan, wasiirkii hore ee amniga Jubaland, oo horay loogu eedeeyay xadgudubyo ka dhan ah xuquuqda aadanaha, gaar ahaan gobolka Gedo  magaaladiisa Buulo Xaawo.

Janan ayaa la rumeysan yahay in hadda uu xiriir hoose la leeyahay Villa Somalia, iyadoo qorshuhu yahay in la geeyo ciidamada dowladda Gedo, si looga gooyo maamulka Jubaland gobolkaas.

Wadahadallada Mucaaradka iyo Jahwareerka Siyaasadeed

Dhinaca kale, wax horumar ah lagama gaarin wadahadalladii u socday Madaxweyne Xasan Shiikh iyo isbahaysiga mucaaradka ee Samata-bixinta. Wadahadalladaas ayaa ku dhammaaday natiijo la’aan, taasoo sii kordhisay walaaca beesha caalamka ee ku aaddan xaaladda siyaasadeed ee Soomaaliya.

Weli lama hayo hannaan doorasho oo ay siyaasiyiinta Soomaaliyeed ku mideysan yihiin, iyadoo muddo xileedka Madaxweyne Xasan Shiikh iyo hay’adaha dowladda uu sii dhammaanayo, xilli lagu jiro xaalad hubanti la’aan ah oo laga cabsi qabo inay dalka geliso qalalaase siyaasadeed.

GAROWE ONLINE