Xiisad Ka Taagan Gollaha Shacabka ee Baarlamaanka Federaalka Soomaaliya

Muqdisho – Golaha Shacabka ee Baarlamaanka Federaalka Soomaaliya ayaa wajahaya xiisad siyaasadeed oo cirka isku shareertay, taas oo ka dhalatay khilaafaad u dhexeeya xildhibaanno ka tirsan baarlamaanka iyo hoggaanka golaha.

Xiisaddan ayaa ka bilaabatay muran ka dhashay xasaanad-ka-qaadistii Xildhibaan Abiib iyo habka loo maareynayo ajandayaasha fadhiyada golaha, gaar ahaan doodaha la xiriira sharciyo muran badan dhaliyay iyo mooshinno la sheegay in laga gudbiyay xubno ka tirsan dowladda. Warar hoose ayaa tilmaamaya in qaar ka mid ah xildhibaannada ay ku eedeeyeen guddoonka Golaha Shacabka in uu si dhinac ah u wado howlaha baarlamaanka, iyadoo aan la tixgelin rabitaanka guud ee xildhibaannada.

Dood adag ayaa laga dareemay fadhiyadii ugu dambeeyay ee golaha oo baaqday dhowr jeer, iyadoo mararka qaar xildhibaanno isweydaarsadeen eedeymo iyo hadallo kulul. Arrintan ayaa keentay in fadhiyo qaar dib loo dhigo, halka ay sii kordhayaan baaqyada ku aaddan in la qabto kulan degdeg ah oo lagu xallinayo khilaafka taagan.

Waxaa jira walaac laga muujinayo in xiisaddan ay saameyn ku yeelato shaqada baarlamaanka, gaar ahaan meelmarinta sharciyada muhiimka u ah dowlad-dhiska iyo amniga dalka. Qaar ka mid ah xildhibaannada mucaaradka ah ayaa sheegay in loo baahan yahay in la helo dhexdhexaadin dhab ah oo lagu soo afjaro kala fogaanshaha xubnaha baarlamaanka.

Dhinaca kale, guddoonka Golaha Shacabka weli si rasmi ah ugama jawaabin eedeymaha loo jeediyay, hase yeeshee ilo ku dhow ayaa sheegay in lagu howlan yahay dadaallo hoose oo lagu daminayo xiisadda, si aanay ugu fidin hay’adaha kale ee dowladda.

Xiisaddan ayaa imaneysa xilli dalka uu wajahayo xaalado siyaasadeed iyo amni oo adag, taas oo sii adkeyn karta geeddi-socodka dib-u-habaynta hay’adaha dowladda iyo qabsoomidda doorashooyinka mustaqbalka dhow. Dad badan ayaa isha ku haya sida ay xaaladdu u saameyn doonto kalsoonida dadweynaha ee hay’adaha sharci-dejinta.

GAROWE ONLINE