Xukun isku-dhiibka nabdoon ee Soomaaliya oo 20 jirsaday

Waa dhacdo dhif iyo naadir ah in laga helo dal ku yaala qaaradda hodanka ah ee Afrika.

MUQDISHO, Soomaaliya - Ka sokow daganaanshiyo la'aan, xasilooni darro iyo falal argagixiso, Soomaaliya ayaa ku naalooneysa awood isku wareejin nabdoon muddo 20-sano oo xiriir ah.

Waa dhacdo dhif iyo naadir ah in laga helo dal ku yaala Afrika. Qaaradda waxay ku suntan tahay xukun isku-dhajin iyo afgambi ciidan. Labadan waxay kasoo horjeedaan nidaamka dimuqraadiga ah.

Madaxweynaha 10aad ee Soomaaliya, Xasan Sheekh Maxamuud, ayaa Isniinta maanta ah wuxuu xilka kala wareegay madaxwaynihii 9aad, Maxamed Cabdullaahi Farmaajo.

Intii lagu guda jiray munaasabadda xil wareejinta, madaxweynihii hore Farmaajo ayaa xaqiijiyay soo laabashada ilaa 5,000 oo askari oo tababar loogu soo gaba gabeeyay Eritrea sanadkii hore ay dib u dhacday.

Sida laga soo xigtey Farmaajo, dib-u-dhaca waxaa keenay "si looga fogaado in saameyn ay ku yeelato xaaladda siyaasadeed iyo doorashada"; faylkooda waxaa lagu wareejiyay Xasan Sheekh Maxamuud.

Dhankiisa, Xasan Sheekh Maxamuud ayaa munaasabadda uu xilka kula wareegay ka sheegay in sida ugu dhaqsiyaha badan uu uga shaqeyn doono soo celinta askarta Soomaaliyeed ee lagu soo tababaray dalka Eritrea "si ay uga qeyb qaataan xoreynta dalka".

Kiiska ciidamaddan ayaa si weyn u hareeyay maalmihii ugu dambeeyay ee xilheynta Farmaajo kaasoo la filayo in uu caasimadda Muqdisho ka dago guri kiro ah oo uu baaqi kusii ahaan doono muddo.

GAROWE ONLINE