Cali Balcad Oo Hadlay Fursadda Itoobiya ee Helista Badda Soomaaliya

MUQDISHO, Soomaaliya - Wasiiru Dowlaha Arrimaha ee Soomaaliya, Cali Balcad, ayaa si cad oo adag uga hadlay fursadda Itoobiya ee helista badda iyada oo loo marayo Gacanka Cadmeed, isagoo sheegay in arrintan aanay ahayn mid suurto gal ah. Wasiirku waxa uu si gaar ah u sheegay in Soomaaliya ay leedahay deked muhiim ah oo ku taalla Gacanka Cadmeed, taasoo ah dekedda Berbera, oo ah mid aan si buuxda loo isticmaalin, ayna tahay fursad weyn oo ay Itoobiya isticmaali karto si ay u xalliso baahiyaha ganacsi ee badda.

Cali Balcad waxa uu sidoo kale sheegay in Berbera ay leedahay awood iyo baaxad ay ku bixiso adeegyo lagu horumarin karo kaabayaasha ganacsi ee Itoobiya, waxaana uu soo jeediyay in labada dal ay ka faa’iideystaan iskaashi dheeri ah oo ku saabsan sidii loo horumarin lahaa dekedda, isla markaana loo adeegsan lahaa sidii looga faa'iideysan lahaa kheyraadka muhiimka ah ee Gacanka Cadmeed.

Wasiirka ayaa sidoo kale caddeeyay in arrintan ay tahay mid ay labada dal si qoto dheer uga wada hadli doonaan, waxaana uu tilmaamay in kooxo farsamo oo ka socda labada dal ay si faahfaahsan u eegi doonaan arrintaas marka ay soo gasho bisha Febraayo 2025, inta lagu jiro kulamo qorsheysan oo ay yeelan doonaan.

Wuxuu sidoo kale xusay in wada hadalladaas ay diiradda saari doonaan sidii loo xoojin lahaa xiriirka labada dal, loona hormarin lahaa iskaashiga dhinacyada kala duwan, sida amniga, dhaqaalaha, iyo arrimaha bulshada. Cali Balcad ayaa hoosta ka xariiqay inta uu Xasan Sheekh Villa Somalia joogo aan loo ogolaan doonin Itoobiya inay saldhig ku yeelato Badda Soomaaliya.

Dhinaca kale, Cali Balcad waxa uu ka digay in loo oggolaado Itoobiya inay si toos ah u gasho badda, isagoo ka sheegay in Soomaaliya ay mas’uul ka tahay ilaalinta baddeeda iyo ilaha dhaqaale ee ku yaal Gacanka Cadmeed. Wuxuu sidoo kale xusay in labada dal ay horey u gaareen heshiisyo kala duwan oo ku saabsan iskaashiga ganacsi, kuwaas oo uu rajeynayo in laga dhigo mid ka mid ah tiirarka xiriirka Soomaaliya iyo Itoobiya ee mustaqbalka.

GAROWE ONLINE