Ciidamada Mareykanka oo kordhinaya joogitaankooda Soomaaliya 

MUQDISHO, Soomaaliya - Taliska Ciidamada Mareykanka ee Afrika (AFRICOM) ayaa shaaciyay in ciidamada Mareykanka ee Soomaaliya ay sii joogaan muddo ka dheer tan la filayay, iyadoo loo tixgelinayo dagaalka socda ee ka dhanka ah xubnaha ISIS iyo Al-Shabaab, kuwaas oo dhibaato weyn ku haya gobolka Geeska Afrika.

Pete Hegseth, oo ah Xoghayaha Difaaca ee Mareykanka, ayaa ka hadlay suuragalnimada in ciidamada Mareykanka ay sii joogaan Afrika, inkastoo qorshihii hore ee maamulka Donald Trump uu ahaa in ciidamada laga soo saaro qaaradda taasoo qeyb ka ah qorshaha "dhimista miisaaniyadda." Hegseth ayaa sheegay, "Afrika waa meel muhiim ah oo lagu dagaallamayo kooxaha argagaxisada".

Haatan, Mareykanka waxaa ka joogaa ku dhawaad 500 oo askari gudaha Soomaaliya, kuwaas oo qeyb ka ah dagaalka ka dhanka ah Al-Shabaab iyo ISIS, oo abuuraya dhibaatooyin amni dalka iyo Gobolka.

Bishii hore, Mareykanka wuxuu duqeyn ka geystay buuraha Calmiskaad ee Puntland, oo uu bartilmaameedsaday qorsheeye weerar oo ka tirsan ISIS, oo lagu magacaabi jiray Axmed Maeleninine, kaas oo la sheegay inuu mas’uul ka ahaa qorista iyo abaabulka xubnaha ajnabiga ee kooxda.

Dhamaadkii sanadkii hore, ciidamada Mareykanka ayaa sidoo kale duqeynno ka geystay kooxda Al-Shabaab, iyadoo la dilay dhowr dagaalyahan. Taliska AFRICOM ayaa sidoo kale bixinaya kormeer hawada ah si ay uga caawiyaan Ciidanka Xoogga Dalka Soomaaliya inta ay la dagaallamayaan kooxahaas.

Hegseth ayaa sheegay in hogaamiyayaasha adduunka ay sameynayaan qalad haddii ay u maleynayaan in dadaalka Madaxweyne Donald Trump ee dib-u-eegista joogaanka ciidamada Mareykanka ee caalamka uu ka dhigan yahay in Washington ay ka baxeyso, wuxuuna intaa ku daray, "Waxaan ka fikiraynaa si taxaddar leh, waxaanu qorshaynaynaa, waxayna muhiim tahay inaan xoogga saarno meelo muhiim ah si aan uga hortagno colaadaha."

Tani waxay muujineysaa in Mareykanka uu qorsheynayo in uu sii wado taageerada uu siiyo Soomaaliya, iyada oo la raacayo istaraatijiyad cusub oo ka hortagga argagixisada iyo ilaalinta amniga gobolka.

GAROWE ONLINE