Dagaal culus iyo qaraxyo gaadiid ah kadib Al-Shabaab oo la wareegtay Moqokori

MUQDISHO, Soomaaliya — Dagaal culus ayaa Isniintii ka qarxay gobolka Hiiraan ee bartamaha Soomaaliya, kadib markii dagaalyahannada Al-Shabaab ay weerarro dhowr jiho ah ku qaadeen degmada Moqokori iyo deegaanada ku hareeraysan, sida ay sheegeen dadka deegaanka iyo ilo-wareedyo maxalli ah.

Kooxda Al-Shabaab ayaa sheegatay mas’uuliyadda weerarradaas abaabulan oo ay ka mid ahaayeen qarax is-miidaamin ah oo lala beegsaday xarumo ciidan oo ku yaalla Moqokori, iyo sidoo kale dagaallo weli ka socda deegaanka Gumarre oo dagaal laga soo sheegay tan iyo Axaddii.

Bayaan kasoo baxay Al-Shabaab ayaa lagu sheegay inay si buuxda ula wareegeen degmada Moqokori isla markaana ay ku dileen ugu yaraan 40 askari. Kooxdu waxay sidoo kale baahisay sawirro muujinaya dagaalyahannadooda oo gudaha u jooga xarumo ay sheegeen inay horey u maamuli jirtay dowladda Soomaaliya, kuwaas oo magaalada gacanta ku haysay tan iyo sanadkii 2022.

Mas’uuliyiinta dowladda Federaalka iyo kuwa maamulka Hirshabelle wali ma aysan soo saarin war rasmi ah. Si kastaba ha ahaatee, war kooban oo lagu daabacay warbaahinta dowladda ayaa lagu sheegay in ciidamada dowladda iyo kuwa deegaanka ay fashiliyeen weerarka Al-Shabaab isla markaana ay gaarsiiyeen khasaare culus.

Dadka deegaanka Moqokori ayaa u sheegay warbaahinta maxalliga ah in dagaalyahannada Al-Shabaab lagu arkayay gudaha magaalada subaxnimadii Isniinta, halkaas oo ciidamada dowladda iyo maleeshiyaadka deegaanka ee loo yaqaan "Macawiisleyda" ay dib ugu gurteen duleedka magaalada. Rasaas goos-goos ah ayaa wali laga maqlayay agagaarka degmada.

Dowladda Hirshabelle iyo tan Federaalka ayaan weli ka hadlin xaaladda rasmiga ah ee degmada Moqokori, taasoo si degdeg ah isu beddeli karta marka laga eego xaalada dagaal ee ka taagan.

Moqokori ayaa noqotay magaalada labaad ee muhiim ah oo Al-Shabaab la wareegto tan iyo bishii Abriil sanadkan, kadib markii ay qabsadeen degmada Aadan Yabaal ee gobolka Shabeellaha Dhexe.

Weerarradan ayaa imaanaya xilli Al-Shabaab ay kordhisay weerarada ka socda bartamaha Soomaaliya, inkastoo ay socdaan howlgallo ciidan oo lagu doonayo in lagu wiiqo awoodda kooxda ee miyiga dalka.

— Garowe Online