Dowladda oo billowday bixinta kaararka codbixinta doorashada xili uu jira khilaaf

Muqdisho – Dowladda Federaalka Soomaaliya ayaa maanta si rasmi ah u bilowday qaybinta kaararka codbixinta ee doorashada golayaasha deegaanka ee gobolka Banaadir, xilli uu weli jiro muran xooggan oo ku saabsan habraaca iyo nidaamka loo marayo doorashada la qorsheeyay.

Guddiga Gaarka ah ee Doorashooyinka Banaadir ayaa sheegay in bixinta kaararka ay ka socoto dhowr xarumood oo ku yaalla degmooyinka Muqdisho, isla markaana ay muhiim u tahay in dadka deggan caasimadda loo diyaariyo marxaladda codeynta.

Si kastaba, tallaabadan ayaa ku soo aadaysa iyadoo khlaaf xoog leh ka taagan yahay qaabka loo dejiyay nidaamka doorashada dalka. Waxay Mucaaradka ku eedeeyeen dowladda in aysan jirin hannaan “hufan oo loo siman yahay,” halka qaar kalena ku doodaan in qaab-dhismeedka doorashada aan weli la isla meel dhigin.

Sidoo kale, waxaa la isku khilaafsan yahay dastuurka, iyadoo maqaamka Caasimada ayaa wali la isku raacin, waxaana lagu eedeeyay Villa Somalia inay afduubtay hanaanka doorashadda, taasoo keentay inay Puntland iyo Jubaland qaadacaan shirarkii Gollaha Wadatashiga kadib markii heshiis looga gaari waayay arrimahaan.

Mas’uuliyiin ka tirsan Wasaaradda Arrimaha Gudaha ayaa ku adkaystay in doorashadu ay dhici doonto waqtigeeda, ayna dowladda ka go’an tahay in la dhiso gole deegaan oo sharciyad ku fadhiya, si loo hormariyo adeegyada bulshada iyo maamulka caasimadda.

Inkasta oo khilaafka siyaasadeed uu weli taagan yahay, dowladda ayaa ku boorrisay shacabka gobolka Banaadir inay qaataan kaararkooda codbixinta, iyadoo sheegtay in arrintaasi ay tahay “tallaabada ugu horreysa ee xaqiijinaysa in codka shacabka uu door muuqda ka qaato maamul daadejinta magaalada.”

GAROWE ONLINE