Firdhiye oo Xasan Sheekh la wadaagay Warbixin ku saabsan Xaaladda SSC-Khaatumo

MUQDISHO, Soomaaliya - Hoggaamiyaha maamulka SSC-Khaatumo, Mudane Cabdiqaadir Axmed Aw Cali Firdhiye, ayaa maanta kulan muhiim ah la yeeshay Madaxweynaha Soomaaliya Xasan Sheekh Maxamuud, isagoo la wadaagay warbixin dhameystiran oo ku saabsan xaaladda ka jirta gobollada SSC, gaar ahaan dhinacyada nabadda, horumarka iyo dowlad-dhiska.

Kulankan oo dhacay xilli hoggaamiyuhu weli ku sugan yahay magaalada Muqdisho, ayaa qeyb ka ah kulamo uu la yeelanayo madaxda sare ee dowladda Federaalka iyo diblomaasiyiin caalami ah. Firdhiye ayaa si cad u muujiyay sida ay SSC-Khaatumo uga go’an tahay in ay noqoto qeyb buuxda ka ah nidaamka federaalka Soomaaliya.

“Waxaan uga mahadcelinayaa Madaxweynaha sida uu mar walba u garab taagan yahay dhismaha maamulka SSC-Khaatumo. Tani waa tallaabo muujinaysa in la garowsaday baahida deegaanka iyo rabitaanka shacabka,” ayuu yiri hoggaamiyuhu.

Firdhiye ayaa uga mahadceliyay sidoo kale Xasan Sheekh casuumaadda uu usoo diray ee ka qeybgalka Shirka Gollaha Wadatashiga Qaran.

Intii uu ku sugnaa caasimadda, Firdhiye wuxuu kulamo la qaatay mas’uuliyiin ka tirsan labada gole ee dowladda, isagoo sidoo kale kala hadlay sidii loo dardar gelin lahaa taageerada dhaqaale, mid amni iyo mid siyaasadeed ee SSC-Khaatumo.

Firdhiye ayaa dhawaan ka qeybgalay markii ugu horeysay shirka Gollaha Wadatashiga Qaran kadib markii dowladda Federaalka maamul Federaalka katirsan u aqoonsatay SSC-Khaatumo, kadib booqashadii Xamse ee Laascaanood.

GAROWE ONLINE