Golaha Shacabka ee Baarlamaanka oo maanta ansixiyay heshiiska ku biirista EAC

Heshiiskan ayaa waxaa ogolaatay 148-Xildhibaan waxaana diiday hal mudane.

Muqdisho, Soomaaliya - Guddoomiye ku-xigeenka 2aad ee Golaha Shacabka Baarlamaanka Jamhuuriyadda Federaalka Soomaaliya Abdullahi Omar Abshir (Abshirow) ayaa maanta shir guddoomiyay Kalfadhiga 4-aad kulankiisa 11-aad.

Ajandaha kulanka ayaa ahaa Akhrinta Hindise-Sharciyeedka Hay'adda Xisaabiyeyaasha Soomaaliyeed, Hindise-Sharciyeedka Ilaalinta Maareynta Deegaanka, iyo heshiiska ku biirista Urur Goboleedka Dhaqaalaha Bariga Afrika.

Mudanayaasha Golaha Shacabka Baarlamaanka dalka ayaa ansixiyay Hindise-Sharciyeedka Hay'adda Xisaabiyeyaasha Soomaaliyeed, iyadoo 149-mudane ay ogolaadeen, hal wakiilna uu diiday.

Waxa ay sidoo kale ansixiyeen Hindise-Sharciyeedka Ilaalinta Maareynta Deegaanka, waxaana ogolaatay 150-Xildhibaan mana jirin xildhibaano diiday ama ka aamusay.

Mudanayaasha Golaha Shacabka ayaa markii dambe ansixiyay heshiiska ku biirista Urur Goboleedka Dhaqaalaha Bariga Afrika, waxaana ogolaatay 148-Xildhibaan, hal Xildhibaan ayaa diiday hal Xildhibaanna waa uu ka aamusay.

GAROWE ONLINE