Guusha Puntland ee Dagaalka ISIS ee Calmiskaat iyo Taageeradda Mareykanka

BOOSAASO - Guusha Puntland ka gaartay dagaalka ISIS ee Calmiskaat waxaa lagu tilmaamay mid taariikhi ah, oo muujinaysa awoodda dowladda iyo sida ay ugu go'an tahay inay baabi'iso kooxaha argagixisada ee gobolka Bari, oo buuraha ku yaalla ay ka dhigteen gabaad iyo saldhigyo ay ku tababartaan ISIS iyo Al-Shabaab.

Dagaalkaas, oo socday muddo bilah ah tan iyo December 2024, wuxuu ka dhacay deegaanka Calmiskaat oo ku yaal dhulka buuraleyda ee gobolka Bari ee Puntland.

Xoogaga ISIS waxay isku dayeen inay joogitaan xooggan ku yeeshaan deegaanno ka tirsan Puntland, balse ma aysan u fulin qorshahooda maadaama dowladda iyo shacabka oo isku duuban kahor tageen khatarta amni ay ku hayeen deegaanka. Waxaa la rumeysan yahay in kooxda ISIS ee Puntland ay ka koobnayd 1,000 xubnood, kuwaas oo badankoodu ahaa muhaajiriin ajnabi ah oo ka yimid dalalka Ciraaq, Suuriya iyo meelaha kale oo Afrika katirsan.

Dagaalka Calmiskaat ayaa horseeday in ay burburto cabsidii iyo canshuurtii baada ee ganacsiga Boosaaso laga qaadayay. Intii lagu jiray dagaalka, ciidamada Puntland oo ay taageerayaan diyaaradaha Mareykanka iyo Imaaraatka ayaa guul weyn gaaray. Waxaa sidoo kale la ogaaday in ISIS aysan helin taageero dibadda ah, taas oo ka dhigtay inay sii wiiqanto awoodda kooxdaas.

Si kastaba ha ahaatee, guusha Puntland ee ka dhanka ah ISIS waxay noqotay mid si weyn loo ammaano, iyadoo taageerada Mareykanka ee hawlgalladaasi ka qeyb qaadatay in laga hortago khatarta ISIS ee gobolka.

Si loo xoojiyo guushan, Puntland waxay ku boorisay wadashaqeyn dheeraad ah oo caalami ah iyo taageero bulsho, si loo xaqiijiyo amniga iyo xasilloonida gobolka. Guusha Puntland ee ka dhanka ah ISIS waxay sidoo kale hoos u dhigtay halista ay kooxda ISIS ku hayso geeska Afrika, iyada oo looga baahan yahay in la xoojiyo awoodda dagaalka.

Madaxweynaha Puntland, Siciid Cabdullahi Deni, ayaa guushan ka gaaray dagaalka ISIS ku tilmaamaya inay tahay guul muhiim ah, laakiin waxa uu sidoo kale aqoonsan yahay baahida loo qabo in la sii wado la dagaalanka kooxaha argagixisada ee gobolka. 

Trump ayaa bixiyay amar duqeymo loogu fulinayo Calmiskaat, iyadoo weerarkii ugu waynaa lagu dilay Axmed Milaniini, oo u qaabilsanaa ISIS weerarada Mareykanka iyo Yurub. Waxaa lala dilay 13 kale oo ku sugnaa godadka buuraha ka dhex sameysteen.

GAROWE ONLINE