Kenya oo cadaadis kala kulmaysa joogitaanka Ciidanka Jubaland ee Mandheera

Nairobi – Dowladda Kenya ayaa wajahaysa cadaadis sii kordhaya oo looga dalbanayo inay ka saarto ciidamada Jubaland ee lagu eedeeyay inay ku tababaranayaan magaalada Mandheera, iyadoo mucaaradka dalka uu sidoo kale ku biiray codsiyadaasi, kadib markii mas’uuliyiinta maamulka gobolka ee bariga woqooyi ay arrintaasi shaaciyeen.

Madaxweyne ku-xigeenkii hore ee Kenya, Rigathi Gachagua, ayaa hadda ku baaqay in Ciidanka Difaaca Kenya (KDF) ay sugto ammaanka gobolka, isaga oo ku dooday in joogitaanka ciidamada Jubaland uu halis ku yahay madax-bannaanida dalka.

Gachagua oo xilka ka dhacay kadib khilaafkii ka dhashay Madaxweynaha William Ruto, ayaa sheegay in ciidamada shisheeye ay ka howlgalaan Mandheera, islamarkaana ay jirto baahi degdeg ah oo loo qabo in tallaabo milatari laga qaado.

“Ma noqon karto in ciidamada shisheeye ay ku sugan yihiin dhulkeenna madaxa qaranna uu aamuso. Waxaan uga dalbaneynaa inuu amar siiyo hawlgallo lagu sifeynayo ciidamada shisheeye dhulka Kenya,” ayuu yiri Gachagua.

Guddoomiyaha Mandheera, Maxamed Aadan Xalif, ayaa ku eedeeyay ciidamada Jubaland inay xerada ku yeesheen iskuul hoose oo magaalada ka tirsan, taasoo sababtay in iskuulka la xiro iyo in ardayda imtixaannada qaran ee soo socda ay ka barakacaan. Xalif ayaa ka digay in Mandheera loo rogin goob dagaal oo Soomaaliya laga dagaalamo.

Mas’uuliyiinta Jubaland ayaa beeniyay inay ciidamadooda gudaha Kenya joogaan. Madaxweyne ku-xigeenka Jubaland, Maxamed Sayid, ayaa bishan horay sheegay in ciidamadaasi ku sugan yihiin xuduudka u dhaxaysa Soomaaliya iyo Kenya.

Kenya ayaa ah saaxiib istiraatiji ah oo Jubaland ah, iyadoo KDF ay u adeegsaneyso sida aag buffer ah oo lagula dagaallamo kooxda Al-Shabaab.

GAROWE ONLINE