Lugatoor: Beesha caalamka hal dollar kuma bixin dagaalka Puntland kula jirto ISIS

GAROWE, Soomaaliya – Puntland ee Soomaaliya ayaa shaaciyay inuusan helin wax taageero dhaqaale ah oo caalami ah tan iyo markii uu bilaabay dagaal militari oo lix bilood socday oo ka dhanka ah kooxda Daacish (ISIS) oo ku dhuumaaleysaneysa buuraleyda Cal Miskaad ee gobolka Bari.

Madaxweyne ku-xigeenka Puntland, Ilyaas Cismaan Lugatoor, ayaa sheegay in gacan shisheeye oo keliya ay ahayd duqeymo cirka ah oo lagu bartilmaameedsaday xubnaha ISIS, balse aanay jirin wax kaalmo dhaqaale ah oo la siiyay maamulka. Sidoo kale, dowladda federaalka Soomaaliya ayaan wax taageero ah siin Puntland, taasoo uu ku sheegay mid salka ku haysa khilaafaad siyaasadeed.

“Beesha caalamka hal dollar kuma aysan bixin dagaalka aan kula jirno ISIS,” ayuu yiri Lugatoor. “Waxaan aaminsanahay in tani ay tahay mid ka mid ah dagaallada ugu adag ee la dagaallanka argagixisada ee Soomaaliya ka socda.”

Lugatoor ayaa xusay in Puntland ay miisaaniyaddeeda ka goysay qayb si ay u maalgeliso howlgalka militari, taasoo muujinaysa sida maamulka uga go’an yahay inuu la dagaallamo argagixisada isla markaana uu sii wado adeegyada muhiimka ah sida mushaharka shaqaalaha iyo maamul wanaagga.

Waxa uu sidoo kale ammaanay kaalinta Soomaalida qurbaha, kuwaasoo uu sheegay inay bixiyeen malaayiin dollar si ay u taageeraan dagaalka. Beelaha deegaanka ayaa isna dhankooda ku deeqay raashin iyo xoolo si loo taageero ciidanka.

Inkasta oo ay jirto xaalad adag oo dhinaca taageerada ah, haddana dowladda Puntland ayaa ku dhawaaqday howlgal cusub oo magaciisu yahay “Onkod,” kaas oo lagu beegsanayo kooxda Al-Shabaab ee la rumeysan yahay inay ku dhuumaneyso buuraha Calmadow, kuwaas oo bari kaga beegan Cal Miskaad.

GAROWE ONLINE