Soomaaliya: Ciidanka dowladda oo dagaal kula wareegay deegaanka Ceel-Baraf

CEEL-BARAF, Soomaaliya - Ciidamada xoogga dalka Soomaaliya iyo kuwa deegaanka ayaa maanta gacanta ku dhigay deegaanka Ceelbaraf ee gobolka Shabeellaha Dhexe, kadib markii ay ka saareen kooxda Al-Shabaab.

Ceelbaraf, oo dhowrkii maalmood ee la soo dhaafay gacanta ugu jirtay Al-Shabaab, ayaa maanta si rasmi ah dib ugu soo noqotay maamulka dowladda. Ciidamada xoogga dalka iyo Macawiisleeyda ayaa duhurnimadii maanta galay gudaha magaalada, iyaga oo ku guuleystay iney la wareegaan deegaanka kadib dagaal ka dhacay agagaarka magaalada.

Inkastoo aysan wali la shaacin khasaaraha ka dhashay dagaalka, Ciidamada iskaashanaya iyo Al-Shabaab ayaa ku dagaalamay duuleedka Ceelbaraf.

Guddoomiyaha deegaanka Tardo ee gobolka Hiiraan Cusmaan Dheere, oo ka mid ahaa hoggaamiyeyaasha ciidamada la wareegay Ceelbaraf, ayaa ugu baaqay dadka ka barakacay deegaanka inay soo laabtaan, isagoo sheegay in magaalada ay xorta tahay.

"Reer Ceelbaraf, soo laabta, magaaladu waa xor. Annaga ayaa idinku soo dhaweynayna, walaaltinimo ayaa ka wanaagsan cadawga aan u midoowno," ayuu yiri.

Kooxda Al-Shabaab ayaa sii waday weeraradeeda gobolka Shabeellaha Dhexe, taasoo keentay in ay gacanta ku dhigaan deegaanada Ceelbaraf iyo Miirtaqwa ee gobolka.

GAROWE ONLINE