Wasiirka Arrimaha Dibadda Soomaaliya oo su’aallo la waydiiyay

Xubnaha guddiga ayaa wasiirka wax ka weydiiyay shaqooyinka safaaradaha Soomaaliya ee caalamka ku yaala.

MUQDISHO, Soomaaliya - Guddiga arrimaha Dibadda iyo Iskaashiga caalamiga ee Golaha Shacabka baarlamaanka jamhuuriyadda federaalka Soomaaliya ayaa xafiiskiisa Villa Hargeysa kulan su'aalo weydiin ah kula qaatay wasiirka wasaaradda Arrimaha Dibadda iyo Iskaashiga caalamiga ee Xukuumadda Federaalka Soomaaliya Danjire Axmed Macalin Fiqi oo ay wehliyaan xoghayaha joogtada ah ee wasaaradda arrimaha dibadda, qaar ka mid ah agaasime waaxeedyada wasaaradda iyo danjirayaal, waxaana kulanka shir guddoominayay guddoomiye kuxigeenka guddiga ahna sii hayaha guddoomiyaha guddiga Xildhibaan Aweys Xuseen Macalin oo uu wehliyo xoghayaha guddiga Xildhibaan Sayid Cali Isaaq.

Fiqi ayaa guddiga uga warbixiyay guulihii laga gaaray arrimaha diblomaasiyadda iyo xiriirka caalamiga oo ay ka mid yihiin xubinimada golaha amaanka iyo ku biiritaanka urur goboleedka dhaqaalaha bulshada bariga Afrika.

Xubnaha guddiga ayaa wasiirka wax ka weydiiyay shaqooyinka safaaradaha Soomaaliya ee caalamka ku yaala ,shirkii dowladda Turkiga ay garwadeenka ka aheyd ee u dhaxeeyay Soomaaliya iyo Eithiopia ,dhismooyinka safaaradaha Soomaaliya ee dayactirka u baahan iyo waxa wasaaradda uga qorsheysan,sidoo kale su'aalaha wasiirka la weydiiyay waxaa ka mid ahaa shirkii Qurba joogta Soomaaliyeed ee dhowaan lagu soo gaba gabeeyay Magaaladda Dooxa ee caasimadda dalka Qadar iyo sidoo kale arinta dal ku galka wadamada Kenya iyo Hindiya.

Guddoomiye kuxigeenka guddiga ahna sii hayaha guddoomiyaha guddiga Xildhibaan Aweys Xuseen Macalin oo kulanka soo xiray ayaa uga mahadceliyay xubnaha ka socday wasaaradda arrimaha dibadda oo uu wasiirka hogaaminayay ka jawaabista u yeeritaanka guddiga ,isaga oo sheegay in kulankan uu ahaa isla xisaabtan si uu guddiga wax uga ogaado shaqada wasaaradda arrimaha dibadda ay Qaranka u heyso.

GAROWE ONLINE