Wasiirka Difaaca Soomaaliya: Awoodda Al-Shabaab waxaan ku daciifinay duqeymo

MUQDISHO, Soomaaliya - Wasiirka Difaaca Cabdulkadir Maxamed Nuur, ayaa sheegay in Al-Shabaab si weyn loogu daciifayay howlgallada dalka qeybo kamid ah ka socda, islamarkaana aysan hadda khatar weyn ku hayn deegaanada ay maamusho dowladda Soomaaliya.

Cabdulkadir, oo si joogto ah u booqda ciidamada ku sugan jiida hore, ayaa sheegay in Al-Shabaab ay ku guuldareysatay inay sii wadaan weerarada. Wuxuu intaas ku daray in hawlgallada joogtada ah ay dhammaantood wax weyn ka tari doonaan amniga dalka mustaqbalka.

Wasiirka Difaaca Soomaaliya Cabdulkadir Maxamed Nuur ayaa sheegay in duqeymaha diyaaradaha ay si xun u daciifiyeen Al-Shabaab, isagoo ku faaney in Ciidanka Cirka dowladda ay fulinayaan duqeymaha, iyagoo adeegsanaya diyaarado helicopter ah oo dhawaan lasoo iibiyay.

Kooxda Al-Shabaab ayaa dhowaan weerarro ka fulisay gobollada dhexe ee maamul goboleedka Hirshabelle, balse iskaashiga ka dhaxeeya Ciidamada dowladda iyo Macwiisleyda gudaha ayaa ku guuleystay in kooxda laga saaro deegaanadaas.

Sidoo kale, in ka badan 20 dagaalyahan oo Al-Shabaab ka tirsan ayaa lagu dilay duqeyn hawada ah, taas oo ka dhacday deegaanka Ceel-Bacad ee gobolka Shabeellaha Dhexe ee Soomaaliya, sida lagu sheegay warbixinada dowladda.

Saraakiil iyo askar ayaa dowladda Soomaaliya looga dilay dagaalka Shabeellaha Dhexe, oo hadda sii xoogeystay, waxaana khatar ku jira deegaano horey AS looga saarey inay dib gacanta kooxda ugu laabtaan.

GAROWE ONLINE