Xasan Sheekh oo Madaxweynaha Kenya kala hadlay colaadaha gobolka

Kulankan ayaa kusoo beegmaya xilli gobolka uu marayo marxalad adag.

Nairobi (GO) - Madaxweynaha Kenya William Ruto ayaa maanta qasirga Madaxtooyada ee magaalada Nairobi ku qaabilay Madaxweynaha Jamhuuriyadda Federaalka Soomaaliya Xasan Sheekh Maxamuud.

Labada hogaamiye ayaa ka wada hadlay qorsheyaasha wadajirka ah ee lagula dagaallamayo AS iyo amni darrada guud ee gobolka oo ay ugu wacantahay khilaafka Soomaaliya iyo Itoobiya.

Qoraal ka soo baxay dowladda Kenya ayaa lagu sheegay in ay ka go’an tahay in ay kala shaqeyso Soomaaliya sidii loo horumarin lahaa nabadda iyo ammaanka gobolka.

Kulankan ayaa kusoo beegmaya xilli gobolka uu marayo marxalad adag, iyadoo inta badan dalalka Geeska Afrika ay ka jiraan colaado gudaha ah iyo kuwoo kala dhexeeya dalalka dariska ah.

Madaxweynaha Kenya William Ruto ayaa wada dadaallo uu ku doonayo inuu isugu keeno dhinacyada iska soo horjeeda, iyada oo ay Nairobi noqotay madal ay ku kulmaan dhinacyada iska soo horjeeda.

GAROWE ONLINE