Xukuumadda Soomaaliya: Puntland waxaan u wareejinay $6.3 milyan

Wasiir ku xigeenka Maaliyada Soomaaliya ayaa sheegay in lacagahan ay yihiin Kabka Miisaaniyada.

MUQDISHO, Soomaaliya - Xukuumadda Soomaaliya ayaa shaacisay inay khasnadda gaarka ahn ee dowladda Puntland ku shubtay adduun lacageed oo gaaraya $6,348,826 oo qayb ka ah kabka miisaaniyadda beesha caalamku siiso Soomaaliya.

Wasiir ku-xigeenka xukuumadda Soomaaliya Cabdiqafaar Xaange ayaa qoraal uu soo dhigay bartiisa Facebook ku sheegay in lacagtaasi caddaan ahaan loo gaarsiiyey Puntland kadib codsi kaga yimid madaxweyne Siciid Cabdullaahi Deni.

"Waxaa xusid mudan in Madaxweynaha Puntland codsaday in lacagahaas caddaanka ( cash) toos loogu soo shubo islamatkaasna wuxuu hor-istaagay in la bilaabo dhammaan mashaariicdii horumarinta ee waxtarka ulahaa deegaanada Puntland oo garaaya boqollaal Milyan oo doolar," ayuu raaciyay.

Kabka miisaaniyaddu waa dhaqaale loogu talagalay in DFS iyo dowlad goboleedyada looga taageero bixinta mushaharaadka iyo dardargelinta adeegyada kale ee lagu fuliyo dakhliga dowladda.

GAROWE ONLINE