Burundi oo ka hadashay askar badan oo looga dilay Soomaaliya
MUQDISHO, Soomaaliya - Dowladda Burundi ayaa xaqiijisay Axadda maanta ah in weerar ciidamadeeda ku sugan Soomaaliya ee qaybta ka AMISOM lala eegtay qaraxyo dhimasho sababay.
Sarkaal sarre oo ka tirsan xoogaga dalkaasi ayaa u sheegay wakaaladda wararka ee AFP in 12 askari looga khaarijiyey qarax kolanyo ay la socdeen lagula eegtay gobolka Shabeellaha Dhexe.
"Ciidanka waxaa la beegsaday iyaga oo howlgal kasoo laabtey kana yimid Jowhar kuna sii jeedey Muqdisho," ayuu yiri sarkaalka oo magaciisa u qariyey sababo la xiriir amniga.
Ururka AlShabaab ee gacansaarka la leh shabakadda Al-Qaacida ayaa dusha saaratay mas'uuliyadda falkaasi oo todobaadkan ka dhacay duleedka degmadda Balcad.
Goobjoogeyaal ayaa u sheegay warsidaha Garowe Online in burbur uu soo gaarey gaari nooca gaashaaman oo ay wateen ciidanka ka tirsan howlgalka Midowga Afrika.
"Qaraxa aad buu u cuslaa. Kadib, waxaa xigtay iska hor-imaad dhex-maray dabley iyo ciidanka, halkaasi oo dad wada marayey ay wax ku noqdeen," ayuu yiri qof kamid ah dadka degaanka.
Wadada isku xirta Muqdisho-Jowhar ayaa kamid ah kuwa ugu khatarta badan ee Soomaaliya, waxaana aalaaba sidaan oo kale lagu beegsadaa ciidanka AMISOM iyo kuwa Soomaaliya.
GAROWE ONLINE