Guddoomiyihii baarlamaanka Puntland oo xilka laga xayuubiyey

Puntland
By WARIYAHA GAROWE , GAROWE ONLINE
Xildhibaanadda Golaha Wakiiladda Puntland ayaa cod u qaadey soo jeedinta oo fadhigii maanta la horgeeyay.

GAROWE, Puntland - Xildhibaano tiradooda ay gaareyso 49 ayaa "Haa" u coddeeyay oo ah in xilka laga qaado afhayeenka Golaha Wakiilada Puntland, Cabdixakiim Dhooba Daareed.

Coddeynta ayaa waxay ka qabsoontay fadhigii Khamiista maanta ah kaasoo ay soo xaadireen Xildhibaano tiradoodu ay gaareyso 53, sidda ay shaacisay xogheynta baarlamaanka.

Sidda uu gudoonka ku dhawaaqay, waxaa coddeynta ka aamustay 4 sharcidejiyeyaal kuwaas oo kasoo qeybgalay fadhigii maanta.

Cabdicasiis Cabdullaahi Cismaan, ku xigeenka koowaad ee xeer-dejinta oo qabtay soo jeedinta, ayaa carabka ku adkeeyay in Mooshinka uu maray hanaanka saxda ah ee loogu talogalay.

Dhooba Daareed, oo la doortey 4-ta bishii Janaayo ee sanadkan 2019, ayaa horey wuxuu wacad ugu maray in uu u hogaan-sami doono go’aan walba oo baarlamaanka kasoo baxa.

Ciidamada ammaanka dowladda Puntland ayaa amniga dhismaha baarlamaanka sugaya, markii ay habeenimadii Arbacada ka saareen maleyshiyaad uu geeyay Dhooba Daareed.

Sidda uu sheegay taliska booliska, xoogaga difaaca Puntland ayaa damacsanaa in ay indho-indheeyaan xaaladda balse ilaalada Dhooba Daareed waxay bilaabeen xabada oo sababtay dhimasho.

Inta la xaqiijiyey saddex ruux – laba askari iyo ruux shacab ah – ayaa ku naf-waayey tacshiiradda "oo muddo kooban socotay".

Xaaladda magaala madaxda dowladda Puntland ayaa haatan ah mid xasiloon, waxaana ammaanka xarunta baarlamaanka oo Xildhibaanadda kusii qulqulayaan sugaya ciidamadda ammaanka.

GAROWE ONLINE

Wararkii ugu dambeeyey