Jawaari: Khayre wuxuu yiri 'Sheydaan baa na kala dhex-galay aan is-cafino'
MUQDISHO, Soomaaliya – Afhayeenkii hore ee Golaha Shacabka, Maxamed Sheekh Cusmaan Jawaari, ayaa markii ugu horeysay wuxuu soo bandhigay nuqul kamid ah xogta kulankii uu la qaatay Xasan Cali Khayre kadib is-casilaadiisa.
Is-araggaas oo qabsoomay bishii April, 2018 ayaa ka dambeeyay kadib dagaal siyaasadeed oo ku dhowaad bil socday isla markaana la sheegay in uu ka dhashay kala aragti-duwanaan iyo mooshino uu qabtay Borofeesarka.
Fahfaahinta uu dibada u soo saarey Jawaari ayaa ka dambeysay markii ra'iisul wasaarihii 19aad ee Soomaaliya, Khayre oo 25-kii July, 2020 uu eryay Aqaka Hoose uu bishaan September 15-keeda uu la shiray mudanaha.
Kulankaas ka dhacay hoyga uu ka degan yahay Muqdisho oo sababay hadal-heyn badan iyo rog-rogitaan kala duwan oo siyaasadeed ayaa yimid maalmo kadib markii Khayre uu iclamaiyey in uu yahay murashax madaxweyne.
Si uu u soo afjaro doodaas baraha bulshadda qabsatay, Jawaari oo u waramay telefishinka maxaliga ah ee Dalsan ayaa meesha ka saarey in wadahadalkooda uu daarnaa in ay ku shiraakoobaan siyaasada mar-xalada kala guurka.
Jawaari ayaa hoos u dhigay wararka sheegaya in kulankan u dambeeyay uu ku saabsanaa raaligelin uu Khayre ka siiyey kaalintii uu ku lahaa dagaalka siyaasadeed oo uu la galay dowladda uu haatan waqtiga ka dhacayo.
Taas bedelkeeda, sharci-dejiyaha ayaa caddeeyay in is-aragoodii Apirl, 2018 uu Khayre si furan uga codsaday cafis, isagoo cuskaday "in uu sheydaan kala dhex-galay".
"Laba berri kadib markii aan istiqaalada dhiibay guriga ayuu iigu yimid noo ducey igu yiri; waan duceysanay sheydaan baa na kala dhex-galay aan is-cafino [buu yiri], markaaas bay ahayd April bay ahayd [raaligelinta] marka dadka waxay fiirinayaan odayga Jawaari ayaa soo salaamay; waxay sheegayaan in aan aniga meesha tagay, in uu isaga ii yimid ma sheegayaan; haddana waxay sheegayaan balaa-balaa," ayuu yiri, isagoo ka gaabsaday shaacinta doorka Khayre ee ridistiisa.
Khayre oo tan iyo markii uu shaaciyey murashaxnimadiisa wadda kulamo ayaa u muuqda mid raadinaya kasoo dhex-muuqashada wararka iyo hadalheyn.
Siyaasiyiinta qaar ee Soomaalida oo dantooda ku gooya go'aanada ayaa badankooda ka hoos-mara fulinta oraahda caanka ah ee "marka aad xil-qabato waxay dadka tusineysaa qofka aad tahay, balse ma bedeleyso shaqsiyadaada".
GAROWE ONLINE