Rooble oo guddoomay casuumaad uu ka helay Kenyatta
-
WARIYAHA MUQDISHO GAROWE ONLINE
- Posted On 08-08-2021, 10:53AM
MUQDISHO, Soomaaliya - Ra’iisul Wasaaraha xilgaarsiinta Maxamed Xuseen Rooble ayaa Axada maanta ah wuxuu xafiiskiisa ku qaabilay Wasiirka Arimaha Dibadda ee dalka Kenya Raychelle Omamo.
Qoraal kasoo baxay xafiiskiisa ayaa lagu xaqiijiyey in ay "ka wada hadleen sare u qaadidda iyo xoojinta xiriirka diblomaasiyadeed ee u dhaxeeya labada dal ee dariska ah ee Soomaaliya iyo Kenya".
"Ra’iisul Wasaare Rooble ayaa Wasiirka Arrimaha Dibadda Kenya ka guddoomay casuumad rasmi ah oo uu ka helay madaxweynaha dalka Kenya Uhuru Kenyata," ayaa la raaciyey bayaanka.
Sidda laga soo xigtay war-saxaafadeedka, "Labada Dal ee Kenya iyo Soomaaliya waa laba dal oo deris oo ay ka dhexeeyaan dano badan sida diblomaasiyadda,amniga iyo arrimaha dhaqaalaha".
"Xukuumadda Soomaaliya waxa ay adkeyneysaa in dacwada muranka badda ee u dhaxeeya Soomaaliya iyo Kenya go’aankeeda laga sugayo Maxkamadda Caalamiga ee Caddaalada," ayaa lagu soo xiray.
Garowe Online ayaa fahansan in Rooble uu Nairobi u socdaali doono Talaadada todobaadkan isla markaana uu halkaas wadahadalo kula yeelan doono Kenyatta iyo madx kale oo waddankaas ka tirsan.
Martiqaadkan ayaa kusoo aadaya xilli madaxweynaha waqtiga ka dhacay Maxamed Farmaajo uu xalay soo saarey wareegto uu xukuumadda uga mamnuucayo in ay gasho heshiisyo ama is-afgaradyo.
GAROWE ONLINE
