Aqalka Sare oo ka digay faragelin lagu sameeyo doorashooyinka maamullada

MUQDISHO, Soomaaliya - Gollaha Aqalka Sare ee Baarlamaanka Soomaaliya, ayaa ka digay in faragelin lagu sameeyo doorashooyinka kusoo wajahan qaar kamid ah dowlad goboleedyada dalka, gaar ahaan Koonfur Galbeed iyo Puntland.

War-Saxaafadeed uu soo saarey Gudiga Joogtada ah ee Aqalka Sare ayaa lagu sheegay in Gollaha uu welwel ka muujinayo islamarkaana uu ka digayo faro-gelin lagu sameeyo doorashada 17-ka bishan ka dhicaysa Koonfur Galbeed Soomaaliya.

Digniinta Aqalka Sare ee faro-gelinta doorashooyinka maamul goboleedyada ayaa kusoo beegmaya xilli dhawaan Baydhabo ay ka degeen Musharaxiin la sheegay inay wadato Villa Soomaaliya, kuwaasoo uu kamid yahay Wasiirka Biyaha iyo Tamarta, Cabdicasiis Lafta-Gareen.

Musharixiinta loolanka Kursiga ugu sareeya ee Koonfur Galbeed ugu jira ayaa waxaa kamid ah sidoo kale Mukhtaar Roobow, hogaamiye ku xigeenkii Al-Shabaab, kaasoo dowladda Federaalka sheegtay inuusan xaq u lahayn inuu galo tartanka.

GAROWE ONLINE