Israa’iil oo Danjire u Magacawday Somaliland

TEL AVIV - Dawladda Israa’iil ayaa si rasmi ah u magacawday danjirihii ugu horreeyay ee u matali doona Somaliland, taas oo ah tallaabo xambaarsan xasaasiyad weyn iyo muran diblomaasiyadeed oo saameeyay Geeska Afrika.

Wasaaradda Arrimaha Dibadda ee Israa’iil ayaa bayaan ay soo saartay ku sheegtay in Michael Lotem loo magacaabay danjiraha aan deganayn ee Somaliland. Lotem oo ah diblomaasi rug-caddaa ah, ayaa horay xilal safiirnimo uga soo qabtay waddamada Kenya, Azerbaijan, iyo Kazakhstan, isagoo hadda u adeegayay Israa’iil sidii danjiraha dhanka dhaqaalaha ee u qaabilsan qaaradda Afrika.

Tallaabadan ayaa timid ka dib markii bishii Diseembar ee sannadkii 2025 ay Israa’iil iyo Somaliland ku dhowaaqeen is-aqoonsi rasmi ah, taas oo loola yaabay maadaama Somaliland ay muddo dheer goobaysay aqoonsi caalami ah.

Go'aankaas iyo magacaabistan cusubba waxay la kulmeen diidmo qayaxan iyo cambaarayn uga timid dawladda Federaalka Soomaaliya, taas oo u aragta tallaabooyinkan kuwo lagu xadgudbayo madax-bannaanida, midnimada, iyo qarannimada Soomaaliya.

Muqdisho ayaa horay u caddeysay inay u aragto xiriir kasta oo toos ah oo lala yeesho Somaliland mid ka hor imaanaya shuruucda caalamiga ah, maadaama ay u aragto gobolkaas qayb ka mid ah dhulkeeda.

Somaliland oo ku dhawaaqday inay ka go’day Soomaaliya inteeda kale sannadkii 1991, ayaan tan iyo xilligaas helin aqoonsi caalami ah oo ballaaran, inkastoo ay u shaqayso sidii maamul ka madax-bannaan dhanka siyaasadda iyo amniga.

Magacaabista Michael Lotem ayaa loo arkaa mid xoojinaysa xiriirka cusub ee dhex maray Israa’iil iyo Somaliland, kaas oo lagu tilmaamay inuu ku dhisan yahay iskaashi dhinacyada horumarka iyo diblomaasiyadda ah.

Xaaladdan ayaa abuurtay dareen kala duwan oo ka dhashay qaaradda Afrika iyo caalamka intiisa kale, iyadoo wadamo badan ay wali dhowrayaan madax-bannaanida dhuleed ee Soomaaliya. In kasta oo Israa’iil ay tallaabadan qaadday, haddana magacaabista safiirkan ayaa loo arkaa inay xiriirka labada dhinac ka dhigayso mid rasmi ah, taas oo sii kordhinaysa xiisadda u dhaxaysa dawladda Federaalka Soomaaliya iyo maamulka Hargeysa.

GAROWE ONLINE