Kenya oo shaacisay mowqifkeeda dagaalka ciidamada Janan iyo DF

NAIROBI, Kenya – Kenya ayaa markii ugu horeysay ka hadashay iska hor-imaadkii todobaadka Baladxaawo ku dhexmaray ciidamada taabacsan Cabdirashiid Janan iyo booliska Soomaaliya ee Haramcad.

Dagaalka oo sababay khasaaro dhimasho iyo dhaawac isugu jira ayaa lagu waramay in uu ka dhacay nawaaxiga aagga loo yaqaano BP1 oo ku dhow xuduudka Mandera ee waqooyi bari Kenya.

Illo wareedyo degaanka ah ayaa u sheegay Garowe Online in qoryaha garbaha laga gano ee loo yaqaano Zaban oo laga soo tuuray Baladxaawo ay kusoo dhaceen xafiisyada maamulka ee Mandera.

Si gaar ah, waxaa lasoo wariyey in ay haleeleen gidaarka dhismaha Wasaaradda Maaliyadda iyo Qorsheynta Maaliyadda faraceeda dowlad goboleedkaas.

Onesmus Kyatha, taliyaha booliska ismaamulka Mandera oo muujiyey sidda uu uga xun-yahay, ayaa ka gaabsaday tafaasiil dheeri ah oo ku saabsan dhacdadaas.

"Waa wax naga careysiinaya. Balse waxaan sii qiimeyn doonaa xaaladda hadii ay sii socdaan. Ma ahan wax na quseeya, balse waxay ka dhacayaan wadan kale," ayuu u sheegay jaraa'idka The Nation.

Jaraa'idka Daily Nation ayaa daabacay in ciidamada Jubaland ee daacadda u ah Cabdirashiid Janan oo ay wehliyaan askar Kenyaan ah ay bilaabeen xabada xilli ay wadeen socod roondo ah.

Kadib iyo markii looga awood-roonaadey isku dhacii Beledxaawo ee 2-dii bishii lasoo dhaafay ee Maaj, ciidamada Jubaland ayaa degay Koromey oo ah duleedka Mandera, halkaas oo ay isku uruursadeen.

Dowladda Soomaaliya oo garab ka helaysa ciidamo Itoobiyaan ah oo aan qeyb ka ahayn howlgalka AMISOM iyo Jubaland ayaa isku haya gacan ku haynta gobolka Gedo oo magaalooyin ay kala xukumaan.

Villa Soomaaliya, oo diidey in ay la shaqeyso maamulka dib loo doortay ee madaxweyne Axmed Maxamed Islaam [Axmed Madoobe], ayaa lagu eedeeyay in ay ka shaqeyneyso khal-khalgelinta ammaanka gobolka.

GAROWE ONLINE