Kenya oo Walaac ka Muujisay Shabakadaha Dhalinyarada u Diraya Dagaalka Ukraine

NAIROBI — Dowladda Kenya ayaa toddobaadkan ku dhawaaqday in 18 Kenyan ah oo loo diray inay ka dagaallamaan furinta Ukraine dib looga soo celiyay Ruushka, kaddib dadaallo diblomaasiyadeed oo lagu badbaadinayo muwaadiniin ku xayirmay xeryo ciidan oo Ruushka ku yaalla.

Wasiirka Arrimaha Dibadda Kenya, Musalia Mudavadi, ayaa bishii hore sheegay in in ka badan 200 Kenyan ay ku biireen ciidamada Ruushka, kuwaas oo ay ku jiraan qaar hore uga tirsanaa hay’adaha ammaanka dalka. Wuxuu ka digay in shabakadaha qortaa ay weli ka howlgalaan gudaha Kenya iyo Ruushka, isagoo xusay in safaaradda Kenya ee Moscow ay diiwaangelisay xaalado ay dad ku dhaawacmeen, qaarkoodna ay gaareen dhaawacyo halis ah.

Dowladda Kenya ayaa hadda ballanqaadday in ay adkeyn doonto kormeerka hay’adaha shaqooyinka dibadda u dira dadka. Mudavadi ayaa sheegay in dhammaan hay’adahaas laga doonayo inay iska diiwaangeliyaan Hay’adda Qaranka Shaqada (National Employment Authority), isagoo xusay in ku dhowaad 600 hay’adood horey looga saaray liiska hay’adaha la oggol yahay.

Ururrada la dagaallama tahriibinta dadka ayaa dalbanaya tallaabooyin adag. Agaasimaha hay’adda Trace Kenya, Paul Adoch, ayaa sheegay in arrintani aysan ahayn mid cusub, isla markaana aysan ku koobnayn dagaal kaliya.

“Waxaan aragnay dhoofin loo dirayo Ruushka muddo saddex sano ah,” ayuu u sheegay RFI. Wuxuu intaa ku daray in haween dhalinyaro ah horey loogu marin habaabiyay shaqooyin warshado ah, balse lagu qasbay inay ka shaqeeyaan warshado sameeya qalab milatari.

Warbixinta Waaxda Arrimaha Dibadda Mareykanka ee 2025 ee tahriibinta dadka ayaa tilmaantay in haween Kenyan ah oo da’doodu u dhaxayso 18 ilaa 22 sano loo ballanqaaday tababar xirfadeed, balse ay ugu dambeyn ku dambeeyeen warshado diyaarad-drones ah oo Ruushka ku yaalla.

Wasaaradda Arrimaha Dibadda Kenya ayaa sidoo kale heshay warbixino sheegaya in dad lagu khiyaaneeyo qandaraasyo been ah, iyada oo loo ballanqaado lacag gaareysa €15,000 oo lagu daboolayo fiiso, safar iyo hoy. Dukumiintiyo diblomaasiyadeed oo sir ahaa, oo toddobaadkan ay daabacday wargeyska Daily Nation, ayaa muujiyay sida shabakadaha qortaa u shaqeeyaan.

Mid ka mid ah ragga la khiyaaneeyay ayaa sheegay inuu u maleynayay inuu helay shaqo ka shaqeynta warshad hilibka farsamaysa, balse markii uu Moscow gaaray loo qaaday xero tababar ciidan, kadibna loo diray Ukraine. Inkastoo qaar yar dib loo soo celiyay, haddana ugu yaraan 82 Kenyan ah ayaa weli ku xayiran Ruushka, sida dukumiintiyada lagu sheegay.

Dukumiintiyadu waxay sidoo kale muujinayaan in Kenyan loo diray xeryo ku yaalla Belgorod, Saint Petersburg, Rostov-on-Don iyo Istra, iyada oo qaar badan aysan lahayn wax khibrad ciidan ah, islamarkaana tababar ka yar toddobaad la siiyo ka hor inta aan dagaalka loo dirin.

Ugu yaraan afar Kenyan ah ayaa ku dhammaaday isbitaallo ku yaalla Moscow, qaarna ay ku dhaceen jabniin iyo xubin-goyn. Martin Macharia Mburu, oo u dhashay waqooyiga Nairobi kana shaqo-doonayay darawalnimo, ayaa la rumeysan yahay inuu noqday Kenyan-kii ugu horreeyay ee si rasmi ah loogu diiwaangeliyo inuu ku dhintay dagaalka Ukraine, kaddib markii lagu dilay dhammaadkii Oktoobar deegaanka Lyman.

Kenya ma aha dalka keliya ee arrintan saameysay. Warbixin sirdoon oo Ukraine soo saartay sannadkii hore ayaa sheegtay in Ruushku uu askar ka qoray dalal ay ka mid yihiin Soomaaliya, Rwanda, Burundi, Congo, Uganda, Nepal, India iyo Cuba. Hay’adda Faransiiska ee Ifri ayaa sheegtay in Afrika gaar ahaan Koonfurta Saxaraha ay tahay meel ay si fudud uga helaan Ruushku askar, sababo la xiriira saboolnimo baahsan iyo rabitaanka tahriibka.

Mid ka mid ah muwaadiniin Camerooniyaan ah oo RFI la hadlay ayaa sheegay in loo sheegay shaqo daryeel, balse uu ku dhammaaday furinta dagaalka Ukraine.

“Waxaan rabaa in Afrikaan la wacyigeliyo si ay u fahmaan in la isticmaalayo,” ayuu yiri. “Waxaan u nimid inaan ku dhimanno dagaal aanan ogeyn sababtiisa.”

GAROWE ONLINE