Dagaalka Iran oo Mareykanka ku kacay $37.5 bilyan, Pentagon-ka oo dalbaday lacag dheeraad ah

Washington – Dagaalka u dhexeeya Mareykanka iyo Iran ayaa ilaa hadda ku kacay ku dhawaad $37.5 bilyan, taas oo ah koror ku dhow $8 bilyan marka loo eego qiyaastii hore ee la sameeyay bishii May, sida uu sheegay Xoghayaha Difaaca Mareykanka Pete Hegseth.

Hegseth ayaa arrintan ka sheegay dhageysi uu la yeeshay guddiga qoondada Miisaaniyadda ee Aqalka Senate-ka, isagoo ku booriyay xildhibaannada inay ansixiyaan $87 bilyan oo dheeraad ah oo loo qoondeynayo Wasaaradda Difaaca Mareykanka.

Qiyaastii $67 bilyan oo ka mid ah lacagtaas ayaa loogu talagalay howlgalada militariga Mareykanka ee Bariga Dhexe, sida uu sheegay madaxa Pentagon-ka.

Dhageysiga ayaa dhowr jeer hakad galay kadib markii dibadbaxayaal ka soo horjeeda dagaalka ay carqaladeeyeen kulanka, kaas oo markii dambe isku beddelay muran kulul oo dhex maray Hegseth iyo mid ka mid ah senatarada.

Waxay ahayd markii ugu horreysay ee Hegseth uu ka soo muuqdo Capitol Hill tan iyo markii dagaallada u dhexeeya Mareykanka iyo Iran dib u billowdeen toddobaadkii hore. Arrintan ayaa sidoo kale timid kadib markii la xaqiijiyay dhimashada saddex askari oo Mareykan ah oo ku sugnaa gobolka.

Aqalka Cad ayaa bishii Abriil Congress-ka ka codsaday $1.5 tiriliyan oo loogu talagalay miisaaniyadda Pentagon-ka sannadka maaliyadeed ee soo socda, taas oo haddii la ansixiyo sare u qaadi doonta kharashaadka militariga Mareykanka heerkii ugu sarreeyay taariikhda casriga ah.

GAROWE ONLINE