Diyaarad rakaab ah oo ka duushay caasimadda Iran oo burburtay
-
WARIYAHA ARRIMAHA CAALAMKA GAROWE ONLINE
- Posted On 08-01-2020, 07:14AM
TEHRAN, Iran - Diyaarad nooca rakaabka ah oo ay saarnaayeen 180 qof oo rakaab ah ayaa kusoo dhacday meel ku dhow garoonka diyaaradaha caasimada Iran ee Tehran waxyar kadib markii ay duushay.
Ma cadda in burburkan diyaaradeed uu xiriir toos ah la leeyahay xiisadda cirka isku sii shareereysa ee u dhaxeysa Mareykanka iyo Iiraan oo xoogeysatay kadib dilkii Qaasim Suleymaani.
Dhacdadaan ayaa timid saacado kadib markii Iiraan ay duqeysay saldhigyo uu Mareykanka ku leeyahay waddanka Ciraaq ee dhaca qaaradda Aasiya.
Wakaaladda wararka dalka Faransiiska laga leeyahay ee AFP ayaa kasoo xigatay Talafishinka Qaranka Iran in shilkan diyaaradeed uu ka dhashay "cilad dhanka matoorka ah".
Diyaaradan oo laga leeyahay waddanka xulafada la ah Mareykanka ee Ukraine ayaa kusii jeeday magaaladda caasimadda ah ee Kyiv, sidda ay sheegtay warbaahinta gudaha.
Sawirro laga soo qaadey meesha uu shilku ka dhacay oo lagu faafiyey baraha bulshadda ayaa muujinaya burbur iyo dab xoogan oo ka dhashay burburka diyaaradda.
Diyaaradda burburtay ayaa nooceedu ahaa Boeing 737, waxaana diyaaradaha ay sameyso shirkaddan sanadihii dambe ay ahaayeen kuwa inta badan ku lug-yeesha shilal, taasoo shaki gelisay badqabkooda.
GAROWE ONLINE
