Maraakiib kuwa Saliida qaada ah oo lagu weerarey gacanka Cumaan
-
WARIYAHA ARRIMAHA CAALAMKA
- Posted On 13-06-2019, 04:59PM
TEHRAN, Iiraan - Xayn kamid ah Shaqaalaha labo markab oo ah kuwa Saliida qaada ayaa la samata-bixiyey kadib markii qarax ku haleeley gacanka Cumaan, maanta oo Khamiis ah.
Dalka Iiraan ayaa sheegey in 21 kamid ah Shaqaalaha Markab, oo la yiraahdo Kokuka Courageous and 23 Ftont Altair, ay samata-bixyeen inkastoo Mareykanku tibaaxay in ciidankooda ay badbaadiyeen qayb kamid ah badmaaxiintaan.
Sababta qaraxa ka dhacey mid kamid ah marinada ugu mashquulsan caalamka ayaan la aqoon xili labada Markab ay weli kor heehaabayaan gudaha badda.
Sarakiil ka tirsan dowladda Iiraan ayaa laga soo xigtay: "Dalka Iiraan wax xiriir ah lama laha shilkaan".
“Dad ayaa isku dayaya in xasilooni daro ku sameeyo xiriirka ay Iiraan la leeyahay caalamka,” ayuu sarkaal sare oo tirsan wadankaas raaciyey hadalkiisa.
Weerarkaan ayaa yimid bil kadib markii afar Markab oo ah kuwa qaada Saliida cayriinka lagu xirey qaraxyo iyagoo taagan dakad ku taal dalka Imaaraadka Carabta.
GAROWE ONLINE
