Mareykanka oo Diyaariyay Qorshaha Duullaanka Dhulka ee Iran

WASHINGTON - Pentagon-ka Mareykanka ayaa diyaariyay qorshe faahfaahsan oo ku saabsan suurtagalnimada duullaan dhulka ah oo lagu qaado Iran, iyadoo kumanaan askari oo dheeri ah loo daabulayo Bariga Dhexe, xilli uu sii xoogeysanayo hawlgalka milatari ee socda.

Wararka laga helayo Pentagon ayaa sheegaya in qorshahan la hordhigay Donald Trump, kaasoo ay ku jiraan dookhyo kala duwan oo ku saabsan in ciidamo lug ah la geliyo gudaha Iran si loo xaqiijiyo hadafyada dagaalka.

Qorshayaasha ayaa ka kooban arrimo dhowr ah oo ay ka mid yihiin qabashada iyo maamulidda maxaabiista dagaalka, iyadoo la diyaariyay goobaha lagu haynayo askarta Iran iyo maleeshiyaadka la qabanayo. Sidoo kale, waxaa la falanqeynayaa bartilmaameedyo istaraatiiji ah sida Jasiiradda Kharg, oo ah meel muhiim u ah dhoofinta saliidda Iran, taasoo la doonayo in la qabsado si loo wiiqo dhaqaalaha Tehran.

Qorshaha ayaa sidoo kale xusaya doorka Joint Special Operations Command, kuwaas oo la filayo inay ka shaqeeyaan sugidda goobaha nukliyeerka ee Iran.

Dhanka kale, kumanaan askari oo ka tirsan Marines-ka Mareykanka iyo ciidamada badda ayaa loo dirayaa gobolka. Markabka dagaalka ee USS Boxer iyo cutubyo Marine Expeditionary Unit ah ayaa horey loogu soo raray gobolka, iyadoo la soo hormariyay waqtigii qorshaha. Sidoo kale, ciidamo ka tirsan 82nd Airborne Division ayaa galay heegan sare si ay ugu biiraan hawlgalka haddii amar la bixiyo.

Afhayeenka Aqalka Cad Karoline Leavitt ayaa sheegtay in diyaar-garowgan uu yahay mid loogu talagalay in madaxweynuhu u yeesho “dookhyo ballaaran,” balse aysan jirin go’aan rasmi ah oo ku saabsan duullaan dhulka ah. Madaxweyne Trump ayaa isna sheegay inuusan hadda qorsheynin dirista ciidamo, isagoo tilmaamay in xitaa haddii uu qorsheeyo uusan si cad u shaacin doonin.

Dagaalka, oo billowday dabayaaqadii Febraayo 2026, ayaa saameyn weyn ku yeeshay suuqyada caalamka, iyadoo qiimaha saliidda uu si weyn u kacay. Inkasta oo cadaadis siyaasadeed uu jiro, ra’yiga dadweynaha Mareykanka ayaa muujinaya walaac ballaaran oo ku aaddan suurtagalnimada dagaal dhulka ah.

GAROWE ONLINE