Sacuudiga oo Wada Qorshe Lagu Dhisayo Isbahaysi Caalami ah oo Lagu Ilaalinayo Maraakiibta Badda Cas

RIYADH – Sacuudiga ayaa wada dadaallo lagu dhisayo isbahaysi caalami ah oo lagu ilaalinayo maraakiibta ganacsiga ee mara Badda Cas, si looga hortago weerarrada ay kooxda Xuutiyiinta ku beegsanayaan maraakiibta, sida ay Arbacadii sheegeen laba ilo oo xog-ogaal u ah wada-hadallada socda.

Sida ay sheegeen ilahaasi, qaabka iyo xubnaha isbahaysiga ayaan weli si rasmi ah loo go'aamin, waxaana arrintan lagala hadlayaa tobannaan dal oo la doonayo inay ka qayb qaataan dadaallada lagu sugayo amniga marin-biyoodka Badda Cas.

Xarunta Isgaarsiinta Caalamiga ah ee Sacuudiga ayaan si degdeg ah uga jawaabin codsi looga dalbaday faallo ku saabsan qorshahan.

Xuutiyiinta oo ay taageerto Iran ayaa 20-kii Luulyo ku dhawaaqay inay cunaqabatayn dhinaca badda ah kusoo rogayaan Sacuudiga gudaha Badda Cas, iyagoo ku eedeeyay Riyadh inay go'doomin ku hayso Yemen. Dowladda Sacuudiga ayaa si cad u beenisay eedeyntaas.

Tan iyo markaas, Xuutiyiintu waxay sheegeen inay weerarro ku qaadeen maraakiib Sacuudi ah oo marayay Badda Cas.

Dhankeeda, Sacuudiga ayaa qaaday duqeymo cirka ah oo uu ku bartilmaameedsaday waxa uu ku tilmaamay xarumo ciidan oo ay Xuutiyiintu ku leeyihiin dekedda Xudeydah ee Yemen, kuwaas oo sida uu sheegay loo adeegsanayay in lagu halis geliyo maraakiibta ganacsiga.

Xiisaddan ayaa furtay jiho cusub oo colaadda gobolka ah, iyadoo ay kusoo beegmeyso dagaalka ballaaran ee u dhexeeya Iran iyo Mareykanka iyo xulafadiisa. Weerarrada sii kordhaya ee lagu hayo maraakiibta shidaalka iyo kuwa xambaarsan badeecadaha kale ayaa sare u qaaday walaaca laga qabo amniga gaadiidka badda iyo saameynta uu ku yeelan karo suuqyada tamarta, iyadoo qiimaha saliidda uu kor u kacay.