Tobanaan lagu xasuuqay qaraxyo lagu weeraray Masjid ku yaala Afghanistan
-
WARIYAHA ARRIMAHA CAALAMKA GAROWE ONLINE
- Posted On 19-10-2019, 02:24PM
KABUL, Afghanistan – Ugu yaraan 60 qof ayaa ku dhimatay, 33 kelana way ku dhaawacmeen markii qaraxyo lagu weeraray Masjid ku yaala gobolka Nangarhar ee Afghanistan.
Weerarkan ayaa wuxuu dhacay intii lagu guda jiray Salaadii Jimcaha, sidda laga soo xigtay mas'uuliyiinta iyo saraakiisha dhanka ammaanka.
Bukaanadda iyo dadka dhintay ayaa waxaa kamid ah caruur, sidda ay shaacisay Qaramadda Midoobay oo warbixin soo saartay.
Jamciyadda Qurumaha Ka Dhaxeysay ayaa carabka ku adkeysay in ay aad u cambaareyneyso falkan, una rajeneyso bukaanadda soo kabasho degdeg ah.
Wadar ahaan dadkii ku sugnaa Masaajidka ee cibaadeysanayey ayaa waxaa la sheegayaa in ay tiradoodu gaarayeen ku dhowaad 400 oo Muslimiin ah.
Illaa iyo haatan ma jirto koox dusha saaratay mas'uuliyadda falkan, waxaase lagu eedeeyay in ay ka dambeysay Taalibaan oo aan ka jawaabin.
Dhowr jeer ayay horey u dhacday in weeraro loo adeegsado qaraxyo lagu qaadey Masaajid ku yaala wadankan ay colaaduhu la dageen iyo meelo kale oo dunida ah.
GAROWE ONLINE
