Trump: In dagaalka Iran sii socdo waxaan ka doorbidayaa heshiis
-
GAROWE ONLINE
- Posted On 06-08-2026, 07:11AM
WASHINGTON — Madaxweynaha Mareykanka Donald Trump ayaa sheegay Arbacadii inuu doorbidayo in heshiis diblomaasiyadeed lala gaaro Iran halkii loo adeegsan lahaa awood militari, balse uu weli furan yahay ikhtiyaarka tallaabo ciidan haddii wada-hadalladu fashilmaan.
“Waxaan doorbidayaa inaan heshiis gaarno, sababtoo ah ma doonayo inaan dad dilo,” ayuu Trump ka sheegay munaasabad ka dhacday magaalada Las Vegas, isagoo sheegay in maamulkiisu uu diyaariyay waxa uu ku tilmaamay “weerarkii ugu weynaa tan iyo Dagaalkii Labaad ee Adduunka,” balse la hakiyay kadib markii saraakiil Iiraani ah ay codsadeen wada-hadallo.
Trump ayaa sheegay in saraakiisha Iran ay la soo xiriireen maamulkiisa ayna dalbadeen in la wada hadlo, inkastoo Tehran aysan xaqiijin sheegashadaas.
“Way i soo waceen, waxayna yiraahdeen, ‘Fadlan ha sameynin, aan wada hadalno,’” ayuu yiri Trump, isagoo intaas ku daray in Mareykanka uu si toos ah ula hadlayo wakiillo Iiraani ah si loo qiimeeyo natiijooyinka suurtagalka ah.
Madaxweynaha Mareykanka ayaa mar kale ku celiyay in Washington aysan oggolaan doonin in Iran ay hesho hub nukliyeer ah, isagoo xusay weerarradii hore ee Mareykanku ku qaaday bartilmaameedyo Iiraani ah, isla markaana sheegay in xal diblomaasiyadeed uu yahay doorashada uu doorbidayo.
“Waan wada hadleynaa. Aan aragno waxa dhacaya,” ayuu yiri Trump, isagoo sheegay in Iran ay “ixtiraamayso” Mareykanka.
GAROWE ONLINE
