Trump: "Israa'iil dambe ma weerari doonto xarumaha gaaska ee Iran."

WASHINGTON – Madaxweynaha Mareykanka Donald Trump ayaa shaaca ka qaaday in xukuumadda Israa'iil ay joojin doonto weerarada ay ku hayso xarumaha gaaska iyo tamarta ee dalka Iran. Hadalkan ayaa yimid ka dib markii Tehran ay weeraro aargoosi ah ku qaadday kaabayaasha tamarta ee waddamada Khaliijka, taas oo argagax gelisay suuqyada caalamka.

Madaxweyne Trump oo ka hadlayay Aqalka Cad ayaa tilmaamay inuu wadahadal la yeeshay madaxda Israa'iil, isagoo xaqiijiyay in la isla gartay in la dhowro xarumaha tamarta si looga baaqsado burbur dhaqaale oo caalamka ku yimaada.

"Israa'iil waxay garawsatay in weerarada lagu hayo gaaska Iran ay keeni karaan cawaaqib xun," ayuu yiri Trump. Wuxuu intaas ku daray in ujeeddadu tahay in la dejiyo xiisadda cirka isku shareertay ee u dhaxaysa labada dhinac.

Maxaa Keenay Isbedelkan?

Weerarkii Iran ay Arbacadii ku qaadday xarunta gaaska ee Ras Laffan (Qatar) iyo Habshan (Imaaraadka), kuwaas oo dhabar-jab ku ahaa sahayda gaaska adduunka.

Qiimaha saliidda oo maanta qarka u saaran $115 halkii foosto, iyadoo laga cabsi qabo inuu gaaro $200 haddii goobaha tamarta la sii weeraro.

Digniintii adkayd ee ka timid Riyadh oo sheegtay in "dulqaadkii Khaliijka ee weerarada Iran uu dhammaaday."

Xaaladda Guud ee Gobolka

In kasta oo Trump uu sheegay in Israa'iil ay ka waantoobi doonto weerarada xarumaha gaaska, haddana ma uusan caddayn in colaadda guud ay istaagi doonto. Iran ayaa horay u sheegtay inay weerarada Khaliijka u geysatay aargoosi ahaan ka dib markii Israa'iil ay 18-kii March weerartay goobta gaaska ee South Pars.

Difaaca cirka ee dalalka Khaliijka ayaa weli ku jira heegan sare, iyadoo Mareykanku uu dedaal ugu jiro inuu ka hortago dagaal weyn oo gobolka ka qarxa oo saameeya dhaqaalaha dunida.

GAROWE ONLINE