Trump oo Iran siiyay fursaddii ugu dambeysay si ay uga badbaado weerarro cusub
-
GAROWE ONLINE
- Posted On 04-08-2026, 07:09AM
WASHINGTON – Madaxweynaha Mareykanka Donald Trump ayaa sheegay in Iiraan ay haysato "fursaddii ugu dambeysay" ee ay ku gaari karto heshiis, si ay uga fogaato weerarro horleh oo uu Mareykanku ku qaado.
Trump ayaa sheegay in maamulka Tehran uu weli haysto waddo diblomaasiyadeed oo uu ku xallin karo khilaafka, balse wuxuu ka digay in haddii heshiis la waayo ay suuragal tahay in Mareykanku sii xoojiyo tallaabooyinka militari.
Hadalka Trump ayaa yimid iyadoo la filayo in la qabto wadaxaajoodyo cusub oo la xiriira xiisadda u dhexeysa Washington iyo Tehran, xilli ay weli taagan tahay walaaca laga qabo amniga marin-biyoodka Hormuz iyo barnaamijka nukliyeerka ee Iiraan.
Dhankeeda, Iiraan ayaa hore u beenisay jiritaanka wadaxaajoodyo toos ah oo ay la leedahay Mareykanka, iyadoo sheegtay in aysan aqbalin cadaadis militari ama hanjabaado lagu qasbayo heshiis.
Xiisadda ayaa weli ka taagan marin-biyoodka Hormuz, oo ah marin ay maraan qayb weyn oo shidaalka caalamka, iyadoo wararka is khilaafsan ee ka imanaya Washington iyo Tehran ay sii kordhiyeen hubanti la'aanta ku saabsan mustaqbalka wadaxaajoodyada.
GAROWE ONLINE
